“Faigo usu del mio derechu reconocíu pol Tribunal Constitucional de falar n'asturianu”, espresó Piñán

La conseyera Berta Piñán tornó a usar con normalidá l’asturianu na Comisión de Cultura, Política Llingüística y Turismu. El voceru de VOX, Ignacio Blanco, apuntó seis momentos nos qu’afirmó nun entendela y criticó’l protocolu, a lo que la escritora respondió-y que “sólo faigo usu del mio derechu reconocíu pol Constitucional”.

Foi a la hora y 16 minutos de la sesión cuando l’abogáu fixo esta quexa. “Lamento que a sabiendas de que yo ya he trasladado varias veces que yo no entiendo integramente la llingua creo que es una mínima norma de educación trasladar el mensaje a un idioma que todos entendamos”, principió, pa depués calcar que “tampoco compartimos el protocolo que se ha aprobado en la Junta General del Principado de Asturias que nos llevaría al absurdo de apuntar cada minuto y cada momento que no entendemos”, citando darréu’l minutaxe de los seis qu’anotó.

“Yo sólo faigo usu del mio derechu reconocíu, nada más y nada menos, que pol Tribunal Constitucional”, pa depués rescamplar que “vusté tien el so derechu a preguntame cuanto quiera que yo-y aclare sobre’l significáu de pallabres, d’espresiones, párrafos, frases o lo que considere oportuno”. Agradeció Blanco que Piñán emplegara’l castellanu na respuesta a les sos entrugues al respeuto del trabayu fechu en rellación a la xestión de los Fondos del Programa Next Generation EU, cuestión pola que la conseyera compareción a pidimientu propiu, y cuestionó-y sobre’l mapa d’estratexes, “donde nos llama l’atención una de las estrategias sectoriales, que es el Plan de Normalización Llingüística” pal que “parece ser que se están pidiendo estos fondos europeos”.

“La normalización llingüística forma parte de la normalización cultural del Gobiernu del Principáu d’Asturies y, poro, ye un elementu d’identidá fundamental que vien recalcáu una y otra vegada nos documentos programáticos de la fondos europeos: señalar la identidá cultural de cada territoriu como dalgo fundamental pal desendolcu non sólo cultural, sinón tamién turísticu”, apuntó, en castellanu, Piñán.