Eva Tejedor & Les Pandereteres, y Caldo y Os Rabizos actúen nel Folk 'in' Grau

El festival cuenta tamién con un pasucais de bandes de gaites y un grupu de baille.

La Banda Gaitas Conceyu Grau y l'Asociación La Veiga'l Cubia entamen un añu más el Folk 'in' Grau. Esti certame va celebrase esti sábadu na villa moscona, cola actividá centrada nel parque de baxu.

A les 18 hores va celebrase un pasucais cola participación del Grupo de Baile Tradicional del Suroccidente Asturiano Perendengue, la Banda Gaites Camín de Fierro, la Banda Gaitas Teixo-Manolo Quirós y la propia banda gaites llocal. Darréu, a les 19 hores, toes estes formaciones van actuar nel parque.

A les 20 hores va llegar el turnu de los conciertos, siendo'l primeru'l d'Eva Tejedor & Les Pandereteres. Con xerme nel 2014 a partir d'un grupu d'escolines d'Eva, el proyeutu toma forma nel 2017 y anguaño, xunto con otros músicos de trayeutoria na música asturiana, tán dando a conocer el so primer trabayu, 'L'entamu'.

Va zarrar la xornada, a les 22 hores, Caldo y Os Rabizos, que yá tien nes sos manes el discu ‘A música tradicional del Eo-Navia’ tres financialu al traviés d'una campaña de cuestación popular. Ésti recueye les pieces que vienen interpretando la formación del occidente en direuto dende l'añu 2015, toos ellos destinaos pal baille.