Europa quier torgar el "spam"

Austria, Bélxica, Chipre, la República Checa, Dinamarca, Francia, Grecia, Irlanda, Italia, Llituania, Malta, Holanda y España son los primeros estaos n'apautase en facer frente contra'l corréu basoria o "spam". Ello ye que los trece estaos roblaron un alcuerdu en que se comprometen a lluchar contra'l corréu basoria, lo que se conoz pol términu inglés "spam". Ente los puntos del alcuerdu ta'l compartir información sobre'l tema y la instrucción de denuncies a nivel européu per aciu d'un procedimientu común

La comisaria europea de la Sociedá de La Información Viviane Redding, fexo un llamáu al restu de países comunitarios pa que s'amiesten a esti pautu, que se fai dientro de la rede de contactu d'autoridaes a la escontra del spam, un órganu que se creo na Comisión Europea de Telecomunicaciones va agora un añu y que nesti tiempu yá fexo daqué acción conxunta ente estaos contra'l spam, casu d'una actuación conxunta ente l'autoridá belga y la francesa, anque'l mayor retu nel terrén del spam nun ta precisamente na UE, y ye que los mayores productores de corréu basoria asítiense en China, país que tien el duldosu honor de ser el llugar onde más spam se manda, sostitoyendo dende va tiempu a l'Arxentina, primer país onde s'entamaron unvios masivos de propaganda non deseao.