Europa da un reblagu hacia la recuperación con un alcuerdu históricu

Per primer vegada la XE va endeudase, pa financiar un plan de 750.000 millones d'euros de los que 390.000 son ayudes a fondu perdíu p'afrontar les consecuencies de la crisis.

Tres cuatro díes de negociaciones, a les 5.31 hores de la madrugada, anunciábase l'esperáu alcuerdu ente los 27 socios europeos. "Deal!", esto ye, tratu n'inglés, espresaba en Twitter el belga Charles Michel, presidente del Conseyu Européu.

Por unanimidá alcordábase un fondu de reactivación tres la crisis sanitaria pola COVID-19 de 750.000 millones d'euros y un presupuestu comunitariu pal periodu 2021-2027 de dalgo más d'un billón d'euros. El 'Next Generation EU', como se noma a dichu fondu, ta conformáu por una cantidá de 390.000 millones d'euros a fondu perdíu en función del impautu de la pandemia de COVID-19 y los 360.000 millones restantes a creitu.

140.000 millones paEspaña

L'Estáu recibirá 140.000 millones d'euros, de los que 72.700 son ayudes direutes y el restu préstamos. El presidente del Gobiernu, Pedro Sánchez, amosó la so satisfaición por un alcuerdu que considera beneficiosu pa España y Europa: "Foi una negociación difícil, na que llevamos metíos nunos meses estraordinariamente complicaos y con un tramu final cansosu y esitosu, tan esitosu como cansosu. Europa enfrentábase a un retu históricu y supo responder con un acuerdu históricu", manifestó.

Na imaxe, un momentu de les negociaciones del Conseyu Européu. Semeya de Pool Moncloa/Fernando Calvo y Pool Conseyu Européu.

Deal!

— Charles Michel (@eucopresident) July 21, 2020