Eurodiputaos socialistes aplauden l'aprobación del plan del carbón

La Delegación Socialista Española nel Parlamentu Européu aplaudió la decisión la Comisión Europea d'aprobar el plan español d'ayuda al sector del carbón porque dexa la “viabilidá al curtiu plazu" del sector.

Consideren que garantiza los xornales de los sos trabayadores, y recalcaron que les polítiques enerxétiques europees "nun pueden arrequexar totalmente" esta fonte, la única autóctona.
  
Nun comunicáu los eurodiputaos socialistes españoles María Muñiz, Antonio Masip, Iratxe García, Inés Ayala, Miguel Ángel Martínez y Sergio Gutiérrez, procedentes toos de fasteres mineres, espresaron el so prestu porque la Comisión atendiera "les sos demandes" y reclamaron al Executivu comunitariu l'aprobación d'un nuevu reglamentu européu d'ayudes públiques que de "estabilidá" al sector y un futuru a les contornes mineres europees.
  
Los socialistes consideren que, ensin un marcu xurídicu estable que contemple un periodu de tiempu ampliu" d'ayudes, nun ye posible fomentar les inversiones tecnolóxiques necesaries que faigan del carbón una fonte d'enerxía llimpia y eficiente.
  
Al so xuiciu, l'esfuerzu inversor de los poderes públicos tien de tener como oxetivu amenorgar la "enorme dependencia enerxética" d'Europa y, pa ello, non puede arrequexase totalmente al carbón", única fonte enerxética autóctona.