Etapa nueva pal Herrero

El bancu más antiguu d'Asturies enxértase dafechu como unidá de negociu de Banc Sabadell. Anque l'Herrero desapaez como empresa, seguirá habiendo Banco Herrero, porque d'agora en p'alantre Banco Herrero sedrá la marca comercial cola que trabaye'l grupu Banc de Sabadell n'Asturies, Cantabria y Castiella y Llión. Incluso va haber más oficines de Banco Herrero, porque la rede del Bancu Asturies, tamién propiedá del grupu Banc Sabadell, cambiará'l so nome pol del Herrero. La cosa nun va ser d'un día pa otru, sinón que va ser un procesu gradual que rematará nel añu 2.003. Queden atrás 90 años d'hestoria qu'entamaron en 1911 cuando Policarpo Herrero, un de los personaxes más influyentes de la burguesía asturiana del primer terciu del s XX y fundador de la Hidroeléctrica echare a andar el bancu. Los Herrero, xunta otros apellíos de rellume como los Fierro, foron de les families más importantes del sieglu que ta acabante terminar, pero los sos emporios financieros y industriales foron esbarrumblando, adulces primero, y bien apriesa de venti años p'acá. Ye'l casu del Herrero, qu'a mediaos de los 90 entró na órbita de la banca catalana, atrayía pol volume d'aforros que movíen los bancos asturianos. En 1995, La Caixa fízose cola mayoría del Banco Herrero, pa vende-ylu va dos años al grupu Banc Sabadell, qu'agora pieslla la historia del Banco Herrero, del que polo menos queda'l nome. Esti artículu de Miguel Ángel García esplica delles claves del procesu.