Estrena de Carne de Gallina

El director Javier Maqua presenta esti mañana nos cines Brooklyn d'Uviéu "Carne de Gallina", que yá pudo vese na gala de clausura del Festival de Cine de Xixón. Karra Elejalde, Nathalie Seseña y Anabel Alonso son los intérpretes más importantes d'esta película que se-y ocurrió facer a Maqua dempués d'una entrevista colos trabayadores de Duro Felguera que taben trancaos na Catedral d'Uviéu va yá cinco años. L'escritor Maxi Rodríguez trabayó con Maqua pa escribir el guón d'esta comedia que quier retratar la situación que se vive anguaño nes cuenques mineres, onde families enteres dependen d'una prexubilación d'Hunosa. Con un guión que nun dexa de recordar al de la irlandesa "Despertando a Ned", anque muncho menos inocente, Carne de Gallina cuenta la historia de los Quirós, una familia que tien de trabayar rápido pa que naide nun s'entere de que'l padre acaba de morrer nun chigre de mala fama. Una quiniela premiada acabará d'enguedeyar l'asuntu. Anque la película nun ta rodada n'asturianu, los autores dicen que tuvieron especial precuru en que nun sonare raro a la oreya d'un espectador d'equí. Nel web oficial de la película puede vese un trailer que confirma'l bon aquel del equipu del filme, anque'l resultáu nun seya pa tirar volaores. Tamién puen descargase cachos de la banda sonora, qu'inclúi un tema entituláu "asturtxales".