Estoyu de conceyales asturianistes

Les distintes opciones asturianistes minoritaries que se presentaben nestes elecciones algamaron resultaos bien discretos, pero ello nun quitó pa que en dellos conceyos consiguieren pequeños trunfos puntuales. Por poner un casu, en medio de la debacle que vivió ayeri, el Partíu Asturianista algamó representación nes cámares municipales de Bimenes y Grandas de Salime, onde sacó dos conceyales. La histórica formación tamién raspió'l conceyal en Llaviana y Ribesella.

Otramiente, los Asturianistes de Nava, grupu nacíu de la resquiebra nel PAS, acusen la marcha de Xulián Fernández Montes, pero saquen los dos conceyales colos qu'ellos mesmos contaben. Arturo Redondo, nuevu líder del asturianismu navetu, tien agora la llave del ayuntamientu, onde PP tien 5 y PSOE 6 conceyales.

Pela so parte, Andecha Astur repite presencia en Riosa y entra al Ayuntamientu de Carreño, onde yá quedare raspiando'l conceyal nel 99. La plaza carreñina va ser de les más revueltes a la hora de resolver l'alcaldía, y ello ye que seyes partíos tienen representación nel ayuntamientu. AA tamién sacó resultaos curiosos en Parres y Morcín, onde quedó a les puertes d'algamar conceyal.

Anque enxertu nun partíu qu'aspiraba a más vuelu, nun dexaremos de dar anuncia nesta noticia de que'l veteranu líder asturianista Xicu Xabel Díaz Yepes, (ex-Ena y ex Lliga Asturiana ente otros) y anguaño militante de la URAS, salió conceyal en Villaviciosa. Ye'l primer cargu públicu al qu'accede esti asturianista de vieyo, que vien a ocupar simbólicamente pal asturianismu la plaza que dexa'l retiráu Mundo Collada.

Pela so parte, IAS, que namás presentaba candidatures en Mieres y Piloña, conviértese en tercer fuerza en Piloña tres de PP y PSOE pero ensin llegar a sacar representación por bien poco, mientres que en Mieres ye cuarta fuerza tres de PSOE, PP y IX, pero bien lloñe del conceyal.