Estibadores de tol Estáu amenacen con paros en solidaridá colos trabayadores d’El Musel

|

La contratación de trabayadores que faen la función d’estibadores na carga de coches ensin matricular na llinia que xune Xixón y Naunnt-Saint-Nazère va movilizar a los estibadores de tol Estáu. Hai preavisu de fuelga pal 7 y 14 d’abril.
 
La Coordinadora Estatal d’Estibadores Portuarios, UXT, CC OO y la Confederación Intersindical Galega, son los sindicatos que van anunciar güei paros de dos hores, ente les 8 y les 10 de la mañana, en tolos puertos del territoriu estatal pa eses feches. L’oxetivu ye que Puertos del Estáu “se pronuncie nel conflictu y dé instrucciones nidies a l’Autoridad Portuaria de Xixón pa que cumpla cola llegalidá vixente” na manipulación de vehículos ensin matricular y plataformes de camión na Autopista del Mar ente Xixón y Naunnt-Saint-Nazère.
 
Los sindicatos, según una nota de la Coordinadora, pretenden asina mostrar el so sofitu a los estibadores d’El Musel, que protagonicen paros dende’l día 3, y nun descarten intensificar les protestes si la Autoridá Portuaria “continúa na so actitú permisiva pa cola contratación illegal de trabayadores pa que faigan la función de los estibadores portuarios”, señalen. Les muestres de solidaridá tamién llegaron dende’l puertu de la Bertaèyn (Bretaña) histórica, onde los estibadores adoptaron midides de presión.

Contador Estadistiques