“Esti premiu ye un reconocimientu a 19 años de llabor”

Xuanxo Mariño, responsable de Radio Sele, recibe esta tarde'l premiu "Andrés Solar" qu'entrega la Xunta Pola Defensa de la Llingua a la entidá que más ficiere al favor de la llingua asturiana. Asturies.com faló col responsable de la emisora uvieina, que declaró que "esti premiu ye un reconocimientu a 19 años de trayectoria que va facer esta emisora'l mes qu'entra, y amás un reconocimientu que vien d'alguién importante como ye la Xunta".

El premiu a Radio Sele llega nun momentu en que sigue ensin resolvese la causa llegal que tien Radio Sele pola recuperación de la llicencia comercial d'emisión que recibiere baxo'l gobiernu de Sergio Marqués y que'l primer gabinete d'Areces-y retirare a los pocos meses nuna polémica decisión que llevó a protestar na cai a los responsables de la emisora y qu'acabó nos tribunales. Mariño ve "imprescindible" la recuperación de la llicencia en cuantes que "como radio llibre que somos agora yá tocamos techu va dos o trés años y poco más podemos facer, porque esta ye una emisora de xente que collabora voluntariamente y que tienen otros trabayos y ocupaciones". Mariño quier que la emisora seya "un xenerador d'información" pero pa ello ye preciso "profesionalizase" y pasar al terrén de les emisores comerciales pa poder pagar a la xente que trabaye nel proyectu. Énte la entruga de si hai güecu pa una emisora n'asturianu nel competíu mundu de les radios comerciales Mariño velo claro "si, esiste esi güecu de mercáu, y incluso ye'l día de güei que siendo radio llibre hai xente que nos llama pa pidinos les tarifes de propaganda".

Con 24 hores ininterrumpíes de programación, anque gran parte de les mesmes son de conteníos esclusivamente musicales, Radio Sele lleva dende 1986 emitiendo nel 107.7 de la FM y dende l'añu 2001 n'internet, un fechu que Mariño destaca como "el socesu más importante na historia de la radio en cuantes que nos abrió a otru mundu distintu y enanchó los nuestros horizontes".

La entrega del Premiu Andrés Solar va celebrase esta tarde a les 8 nel Teatru Xovellanos de Xixón nun actu que va contar coles actuaciones musicales de Nuberu y Xulio Ramos. La figura d'Andrés Solar, del que nel 2004 se cumplieron los venti años de la so muerte, va tar presente nes actuaciones y tamién al traviés de la proyección "Andrés Solar, una voz del surdimientu"