Esti miércoles celébrase’l Día Mundial de los Océanos

El 8 de xunu ye’l Día Mundial de los Océanos, xornada instaurada por Naciones Xuníes (NN XX) nel 2009 pa concienciar a la ciudadanía sobre la importancia que tien el mar nel nuesu planeta. Los océanos cubren el 71 por cientu de la superficie de la Tierra.
 
“El Día Mundial de los Océanos brinda la oportunidá de reflexonar sobre la importancia de los océanos pal desarrollu sostenible de la humanidá. Constitúi coles mesmes una bona ocasión pa reconocer numberosos y graves problemes qu’afeuten a los océanos”, señaló Ban Ki-moon, secretariu xeneral de NN XX, nel so mensaxe añal coincidiendo con esta xornada. Ente estos problemes cita “el desaniciu de los recursos pesqueros, los efeutos del cambiu climáticu y l’estrozu del entornu marín”, amás de “la seguridá marítima, les condiciones de trabayu de los navegantes y la cuestión, cada vegada más importante, de la migración per mar”. Esti añu, el tema de conmemoración escoyíu por NN XX ye ‘Los nuesos océanos: por un futuru verde’.
 
Esta xornada tamién ye aprovechada por coleutivos ecoloxistes pa recordar la importancia que tien el cuidáu de los nuesos oceános. Asina, la Coordinadora Ecoloxista d’Asturies convida a los asturianos a mirar al Cantábricu “un mar que tamos desaniciando y contaminando”, dalgo de lo que toos somos responsables en mayor o menor midida. Asina, ente los problemes que tien el mar que baña les nueses costes, el grupu ecoloxista destaca los vertíos urbanos y industriales, la sobrepesca, la falta de control de la llimpieza que faen dellos barcos n’alta mar, el cambiu climáticu o les grandes obres como la d’El Musel que modifiquen corrientes y cambien l’entornu. Por ello, llamen a los asturianos a collaborar na conservación de los océanos: “Si tol que tuviese dalguna relación llaboral, comercial, d’ociu o profesional cola mar dedicase polo menos una hora a la selmana a la so defensa, los resultados seríen ablucantes”.
 
Otros coleutivos, como Oceana, alerten de que “los océanos enfréntense a ún de los peores periodos de la so historia, que van conducir a cambios catastróficos si nun s’emprenden aiciones decisives y con carauter inmediatu”. “Los océanos tán en peligru y la ciencia nun dexa dulda, pero hai soluciones. Lo que fai falta ye voluntá política de cambiu. El Día Mundial de los Océanos nun debería ser una xornada de celebración n’Europa, sinón una llamada a la aición”, afirma Xavier Pastor, direutor executivu d’Oceana Europa, asociación qu’ufre datos como que’l 88 por cientu de los ‘stocks’ pesqueros europeos tán sobreesplotaos, que’l 13 por cientu de les captures devuélvense al mar muertes o que’l 99 por cientu de les especies marines en peligru de desaniciu nun tienen planes de conservación.
 
Mentes, SEO/BirdLife presentó güei en Santander un proyeutu pa la conservación de les aves marines y el so hábitat nel Atlánticu européu que lleva’l nome de ‘Proyeutu InterReg FAME’. Nél participen l’Estáu español, Portuga, Francia, Reinu Xuníu y Irlanda al traviés de los socios de BirdLife. Na Península Ibérica l’oxetivu del programa ye estudiar les amenazes que les aves atopen nel mediu marín y buscar midíes de xestión que minimicen el so impautu, tratando d’algamar la participación de los seutores implicaos. Mentes, el resto d’estaos, más atrasaos na materia, dediquen el so esfuerzu a la identificación d’Árees Importantes pe les Aves (IBA) marines.