Esti martes fírmase’l trespasu de Picos d’Europa a les CC.AA

Los decretos de trespasu del Parque Nacional de Picos d'Europa a les comunidaes autónomes d'Asturies, Castiella y Lleón y Cantabria, firmaránse esti martes, 14 d'avientu.

En virtú d'ellos, pasarán a xestionar esti espaciu de forma conxunta les tres autonomíes, nuna muestra de "autonomismu últil" que demostrará qu'estes entidaes puen llevar esti entornu natural "mui bien" y d'una forma más próxima.
  
Asina lo defendió la conseyera de Facienda de Castiella y Lleón, Pilar del Olmo, tres presidir esti llunes en Valladolid el conceyu de la Estaya de Castiella y Lleón de la Comisión Mista de Tresferencies que determinó asumir per aprte de la Comunidá Autónoma'l Parque nacional de Picos d'Europa, fechu que se materializará’l martes 14 cola firma, previsiblemente a les 10.30  hores en Madrid, del decretu de tresferencia.
  
Anque'l trespasu que se firma mañana será efectivu a partir del 1 de febreru del 2011, habrá un periodu transitoriu hasta'l mes de setiembre del mesmu añu nel que Parques Nacionales siguirá xestionando esti entornu a la espera de que s'aprueben los distintos decretos per parte de les trés comunidaes autónomes pa la constitución del Consorciu que xestionará esti espaciu y les sos normes. "A partir d'esi momentu yá será --el Parque-- de xestión compartida", esplicó la conseyera.
  
Según precisó Pilar del Olmo, el citáu consorciu funcionará, de primeres, col coste efectivu tresferíu per parte del organismu estatal Parques Nacionales y qu'asciende a un total d'ocho millones d'euros de los qu'a Castiella y Lleón correspuénden-y algo menos de dos millones, "a pesar de que tenemos la mayor superficie del Parque Nacional, anque ye verdá que los medios tán n'Asturies", reconoció la conseyera, que destacó especialmente esa aportación nestos momentos de crisis.
  
“Autonomismu útil”
Tres almitir que'l coste del trespasu d'esta nueva competencia "nun ye mui altu", la conseyera de Facienda recordó que da cumplimientu a una sentencia del Tribunal Constitucional que determina qu'en materia de parques nacionales trátase d'una competencia de les comunidaes autónomes.
  
Pilar del Olmo insistió en que la materialización d'esti nuevu trespasu ye una muestra d'autonomismu últil, de que l'estáu autonómicu tien sen y de cómo nesti casu trés comunidaes autónomes de distintu signu políticu punxéronse d'acuerdu pa facer una xestión del parque.
  
"Nun ye difícil ponese d'acuerdu", señaló la conseyera, qu'esplicó que se trata d'un "trespasu esperáu" que pue demostrar "cómo les comunidaes autónomes, nesa cercanía, vamos demostrar que podemos xestionar mui bien y de manera más próxima'l Parque Nacional de Picos d'Europa".