Esti fin de selmana, folk en Santu Adrianu

L'Albergue'l Sabil nel conceyu de Santu Adrianu entama pa esti vienres y sábadu dos nueches con música y folixa, xente como "Niundes" o "Tuenda" van tar ellí p'asegurar les dos coses.

Dempués de que se suspendiere la edición d'anguaño del tradicional Mercáu y xuntanza Astur de Santu Adrianu, paecía que'l conceyu dibaquedar ensin nenguna nueche folk paestaselmana santa, pero nun va ser asina, yá qu'esti vienres día dos y el sábadu trés l'Albergue'l Sabil tien preparaes dos nueches de música folk. Esti albergue lleva abondos años entamando conciertos nes sos instalaciones, y esta vegada toco-y al folk asturianu. El vienres va ser la oportunidá pa los músicos aficionaos que quieran tocar, un escenariu llibre va tar a disposición de toles persones que pasen pela espicha que va haber partir de les 22:00 hores, que de xuro va calecer l'ambiente pa que daquién s'anime a echar unes pieces.

El sábadu l'escenariu va ser pa dos grupos y una gaitera. A eso de les 23:00 hores vamos tener nel escenariu a "Tuenda", el tríu formáu por Xosé Ambás na voz, Pepín de Muñalén na xiblata y Elías García col bouzouki. Esti grupín formóse p'actuar nel ciclu Folk de cámara qu'hubo en Xixón va unos meses, y depués d'aquella actuación, y la bona acoyida del públicu, los trés músicos decidieron siguir alantre col proyectu. "Tuenda" gasta un repertoriu de temes de tradición vocal de toa Asturies recoyíos pol cantante del grupu, Ambás, cuya voz ye'l principal argumentu que tienen, anque bien acompañada pola xiblata y el bouzouki de Pepín y Elías.

Darréu van subir al escenariu "Niundes", el grupu de Llanes que pudimos sentir nel compilatoriu de L'Aguañaz "Nuevu Folk Asturianu Vol. IV". "Niundes" ta formáu mayormente por músicos de la Escuela de Música Tradicional "Llacín", con dalguna incorparación como ye la del antiguu xiblateru de "Felpeyu" Isidro Suárez. La banda ta acabante de grabar el so primer trabayu discográficu que se cuenta con quesalga al mercáu enantes del branu.

P'acabar vamos poder ver a una "vieya" conocida de los músicos asturianos, sobre too aquellos que son veceros del Festival Intercélticu de Lorient. Ye Marie Le Camp, una gaitera bretona que toca la gaita escocesa va pesllar el conciertu del sábadu. Marie ye una enamorada de la cultura asturiana, y n'Asturies.com tuvimos ocasión de conocela na edición d'anguaño del Festival de Lorient, au comprobamos qu'aparte de ser bona gaitera, tien lacapacidá de sacar al públicu a baillar