Esther Prieto espubliza una gramática rápida d'asturianu

La escritora Esther Prieto ta acabante d'asoleyar cola editorial Trabe la obra Gramática d´asturianu. Guía de consulta rápida, un llibru que va tar nos próximos díes nes baldes de les llibreríes y que s'ufierta como un manual cenciellu y amañosu que valga de complementu a la gramática de l'Academia de la Llingua, proponiendo exemplos y casos prácticos empobinaos a los escolinos y a toles persones que tienen duldes a la hora d'escribir n'asturianu en cuenta de centrase tanto na teoría.

Esta obra vien a complementar el panorama de llibros y materiales d'auxiliu a la escritura n'asturianu, enanchando un catálogu nel que tamién alcontramos obres de Ramón d'Andrés como la so Gramática Práctica d'Asturianu (Editora del Norte 1999). Otra interesante ferramienta, qu'esclaria bien de duldes llingüístiques y Los llibros de la serie "Cuestiones d'asturianu normativu" d'esti mesmu autor,asoleyaos por Ámbitu editorial y nos que se recoyeron los artículos qu'espublizare Ramón d'Andrés en selmanariu "Les Noticies" y que tamién s'espeyaren n'Asturies.com baxo'l títulu "bilordios filolóxicos".

Pela so parte, l'Academia de la Llingua Asturiana tamién dispón de materiales que sirven de complementu prácticu a la escritura n'asturianu, como ye'l casu de les normes ortográfiques de l'ALLA, volume más amañosu y d'enfotu más prácticu que la gramática normativa que va yá pela so quinta edición. Finalmente, y yá nel terrén de les nueves tecnoloxíes, l'Academia de la Llingua desarrolló l'añu pasáu en collaboración cola empresa ARAZ el programa informáticu "iguador" una ferramienta compatible con entornu Windows y que funciona lo mesmo que'l corrector ortográficu de castellanu qu'enxerta'l programa procesador de testos Microsoft Word pero aplicando les normes d'escritura del asturianu, corrixendo los fallos más comunes.