Estadística diz qu’Asturies va perder más de 44.000 habitantes

L'Institutu Nacional d'estadística ta acabante d'asoleyar una proyección que-y da a Asturies ente 44.000 y 58.000 habitantes menos d'equí al 2017.

La proyección sociodemográfica del INE espeya'l futuru poblacional de les comunidaes autónomes nel periodu comprendíu ente'l 2002 y el 2017. Nelli, Asturies apaez como una de les como una de les comunidaes autónomes que van perder más población xunta toles del cuadrante noroeste de la península, y ye que'l fenómenu de perda de población qu'aldovina l'INE va afectar tamién a Castiella y Lleón y a Galicia. La proyección del Institutu dexa a Asturies, qu'agora tien 1.061.942 habitantes, na raya del millón raspiáu pa dientro de doce años acordies cola hipótesis más negativa que contempla l'estudiu y que diz que la perda de población va andar sobre les 58.000 persones, mientres que la hipótesis más optimista, que se tien na hipótesis d'nuna mayor entrada d'inmigrantes tampoco nun ye muncho meyor, y dexa la perda de población asturiana nos 44.000 individuos.

Los datos del Institutu d'Estadística, nos que toles comunidaes autónomes ganaríen población sacantes Castiella-Lleón, Galicia y Asturies, esfarraplen l'optimismu que s'abrió al conocese los datos del censu del 2002, cuando Asturies frenó la perda de población que sufre dende va venti años y ganó 800 habitantes. La baxa natalidá, l'avieyamientu de la población y l'ausencia d'aporte inmigracional faen d'Asturies la comunidá autónoma que presenta peor traza, y ye que mientres Galicia sufriría acordies cola proyección del INE una perda de población del 2,3% y Castiella-Lleón del 2,9%, la sangría demográfica asturiana va ser nel meyor de los casos, del 4,2%. Ello nun contestu en que tol restu del estáu español va ganar población. Según L'INE, España podría tener más de 47 millones d'habitantes nel 2017 y pasar la barrera de los 50 nuna proyección a más llargu plazu que lleva hasta mediaos d'esti sieglu acabante d'entamar.

Entrar al estudiu del INE