Ésta ye la propuesta de moción en defensa de la música y de la cultura n'asturianu en Xixón

Los promotores del manifiestu 'Música n'asturianu sí' y cinco coleutivos presentáronla a FSA-PSOE, Foro, Convocatoria por Xixón y Podemos pa que la lleven a Plenu.

Amás de la recoyida de firmes –4.200 a lo llargo de la selmana pasada–, esti grupu redautó una propuesta de moción "en defensa y promoción de la música y cultura n'asturianu nos eventos festivos, educativos y culturales de Gijón/Xixón". Na mesma cita a autores y bandes como Obdulia Álvarez 'La Busdonga', José González 'El Presi', Alberto Martínez Berciano 'Berto Turulla', Carlos Rubiera, Felpeyu, Hevia o Nacho Vegas, que nacieron o vivieron en Xixón, y plantega cuatro puntos pa llevar a alderique y votación.

El primeru ye "garantizar en Xixón el cumplimientu de la llegalidá vixente en materia de derechos llingüísticos, culturales, llaborales y de llibertá d’espresión que recueye la Constitución española, l'Estatutu d'Autonomía, la Llei de Contratación del Sector Públicu, la Llei d'Usu y Promoción del Asturianu, el Plan de Normalización Llingüística de Xixón, y les ordenances y planes vixentes nesti conceyu. Amás de respetar el conteníu presente na Declaración Universal de los Derechos Humanos, na Declaración Universal de los Derechos Llingüísticos y na Carta Europea de les Llingües Minoritaries".

Sigue apuntando que "cumplir esta llegalidá significa que, de nenguna manera, una persona nin un colectivu, pue ser discrimináu por espresase en llingua asturiana nin poles sos opiniones" y, yá nel terceru, "caltener y aumentar en Xixón la programación d’actividaes y d’eventos en llingua asturiana, tanto los rellacionaos cola cultura tradicional como les creaciones culturales contemporánees, a traviés de les conceyalíes qu’abarquen les árees de Cultura, Educación y Festexos; amás d’en organismos venceyaos a elles como Divertia o la Fundación Municipal d’Educación, Cultura y Universidá Popular".

L'últimu puntu refierse a "promocionar y promover adecuadamente esti tipu d’actividaes dientro de la ciuda de Xixón pa que la so incidencia social seya la mayor posible. Porque cuanto más visible y conocíu socialmente seya esti patrimoniu cultural, meyor va protexese, conservase, valorase y tresmitise ente les xeneraciones venideres". Presenten esta propuesta de moción, amás del grupu promotor de 'Música n'asturianu sí', la Sociedá Cultural Xixonesa; l’asociación Grana, N’Alcordanza de Yolanda Huergo; la Caja de Músicos; la Sociedad Cultural Gesto; y l’Atenéu Obreru de Xixón.

Na semeya, David Varela anuncia a los medios la presentación de la propuesta de moción con Leticia Baselgas, la otra vocera del grupu promotor del manifiestu 'Música n'asturianu sí', detrás.