Ésta ye la presencia del asturianu nos programes eleutorales de los partíos

L’asturianu tien presencia nos programes eleutorales de los partíos con representación parllamentaria, sacante’l del PP, nel que nun hai nenguna referencia, mentes que Foro pretende asoleyalu’l martes o’l miércoles. Amás del apueste pola oficialidá de les formaciones que defenden esta midida y la oposición de la estrema derecha, cada organización fai propuestes concretes rellacionaes col idioma.

Federación Socialista Asturiana (FSA-PSOE): Baxo’l nome de ‘Programa de Gobierno 2023-2027’ el partíu que presidente’l país presenta les sos propuestes. Na estaya ‘Conservación y promoción del patrimonio asturianu’ inclúi un puntu, el 33, que diz –siempre en castellanu, como la totalidá de los partíos– que “la llingua asturiana y l’eonaviego son un patrimoniu cultural compartíu que tenemos la obligación de protexer. Poro, en cumplimiento de la normativa constitucional y de proteición xurídica de les distintes llingües d’España y Europa, impulsaremos el reconocimientu oficial de la llingua asturiana y del eonaviego (ésti nel so ámbitu) nel marcu de la reforma y actualización del Estatutu d’Autonomía d’Asturies. Defenderemos un modelu basáu nel alcuerdu y el consensu, que garantice la proteición de la llingua, xenerador de derechos y non d’imposiciones, d’aplicación progresiva y d’alcuerdu a les circunstancies sociollingüístiques y a les necesidaes culturales d’Asturies”.

El siguiente afita que “se negociará col Ministeriu d’Educación el reconocimientu de les correspondientes especialidaes docentes, y la integración del asturianu y del eonaviego nes Escueles Oficiales d’Idiomes”, pa continuar col 35, qu’apunta que “se apoyará’l Proyeutu Falamos dientro de la rede de formación non reglada pa persones adultes que permite recibir formación de calidá al que voluntariamente la demande, favoreciendo l’enseñu en llinia”. El 36 rescampla que “apoyaremos la formación voluntaria n’asturianu del personal públicu al traviés del Institutu Asturianu d’Alministración Pública y la valoración del so conocimientu como un méritu añadíu” y el 37 que “en xeneral, siguiráse avanzando na promoción d’actitúes positives y integradores hacia l’usu social, potenciando la información sobre l’asturianu y l’eonaviego y impulsando la so utilización en tolos ámbitos nos que sía posible. N’especial, reconociendo’l derechu de recibir tou tipu de conteníos y información nes llingües asturianes nos medios de comunicación de titularidá pública del Principáu”.

Los dos últimos puntos, mentes, apunten que “apoyaremos el trabayu que desendolca l’Academia de la Llingua Asturiana “nel desarrollu, proteición y promoción de la llingua” y que “nel ámbitu de l’Alministración fomentaráse la tresversalidá progresiva nel usu del asturianu y l’eonaviego, procurando utilizar les llingües d’Asturies nes campañes informatives o na publicidá institucional”.

Otra manera, na estaya d’Educación, citen, nel puntu 22, “fadremos que l’asignatura Llingua Asturiana y Lliteratura en Secundaria pase a ser voluntaria en llugar d’optativa”.

Partido Popular (PP): El principal partíu de la oposición nun fai referencia al asturianu o’l gallego-asturiano en nengún de los 185 puntos que conformen el so programa eleutoral.

Ciudadanos: Nel puntu 105 del documentu de la formación naranxa, encabezáu con un ‘Impulsaremos el conocimientu de la cultura tradicional asturiana, ye onde esti partíu cita l’asturianu, que pieslla con un contundente “nun sofitaremos la cooficialidá de la llingua asturiana”. Enantes apunta que “defendemos la proteición, promoción d’usu y difusión de la llingua asturiana nes sos diferentes modalidaes, tal y como se recueye na necesaria y suficiente Llei 1/1998, de 23 de marzu, d’Usu y Promoción del asturianu”.

Podemos: L’ampliu programa de Podemos dedica’l puntu 95 a la ‘Educación n’asturianu’. Nél apunta que “la nuesa llingua nun pue siguir siendo un requexu marxinal y precarizáu na educación pública asturiana", polo que fai trés propuestes: “impulsaremos el diálogu col Gobiernu estatal pa facer realidá la especialidá docente de llingua asturiana y que los y les maestres y profesores puedan exercer el so llabor en condiciones dignes como les demás”, “promoveremos la superación del actual modelu d’opcionalidá n’educación primaria, que nun tiene otra razón de ser que satisfacer prexuicios ideolóxicos” y “retomaremos el desendolcu y promoción de los programes educativos col asturianu como llingua vehicular”.

Yá na estaya de Cultura, nel 137, apunten al ‘Fomentu de la creación artística en llingües minorizaes’ al “impulsar espacios de referencia pal fomentu y promoción de la creación n’asturianu y gallego-asturiano que complementen a las subvenciones direutes y potencien los circuitos esistentes” y “fomentar la conexón y l’intercambiu cultural coles escenes de las distintes llingües propies y cooficiales nel Estáu, asina como con otres comunidaes de llingües minorizaes nel mundu”.

Sobre’l ‘Asturianu gallego-asturiano na RTPA’, el 138, señalen que “la presencia de les llingües propies d’Asturies na radiotelevisión pública ha ser amplia y tresversal, con emisiones regulares de conteníos infantiles, informativos y retresmisiones deportives. La normalización lingüística ha ser una exa central de la misión de RTPA como serviciu públicu”. Darréu añaden que “ha aumentar sustancialmente la partida presupuestaria destinada al usu del asturianu y del gallego-asturiano na RTPA, y firmar un conveniu de collaboración con RTPA pa la creación d’un Serviciu Asturianu de Doblaxe y Traducción, destináu a nutrir de conteníos diversos a la canal pública”.

Por último, destina una estaya a la ‘Reforma del Estatutu y afondamientu democráticu’. El primeru del mesmu, el 201, ‘Oficialidá del asturianu y gallego-asturiano’, comprométese a “da-y al asturianu y al gallego-asturiano l’estatus d’idioma cooficial pa que cada ciudadana o ciudadanu de la nuesa comunidá autónoma pueda emplegar nel ámbitu públicu la llingua pola qu’opte llibremente nel exerciciu democráticu d’un derechu civil, ensin discriminaciones nin imposiciones”.

Convocatoria por Asturies (IX-Más País-IAS): La coalición d’estos trés partíos d’izquierda recueye en ‘Educación’, nel puntu 7, “impulsar les asignatures de Llingua Asturiana, tanto en Primaria como na Educación Secundaria Obligatoria. Ampliar d’igual forma l’usu del asturianu como llingua vehicular nel enseñu a tolos niveles”.

En ‘Cultura’ afita, nel puntu 23, “garantizar la consolidación xurídico-alministrativa y la suficiencia financiera de l’Academia de la Llingua Asturiana pa garantizar el desendolcu plenu de les sos funciones” y, nel siguiente, “aprobar un Plan de Normalización toponímica per aciu d’alcuerdos con toles alministraciones, incluyíes les estatales, de tal manera que tola señalética de los llugares figure col nome normalizáu”.

Nel 22, mentes, diz “promover un alcuerdu nos medios públicos de comunicación social, y sobre manera na RTPA, pa difundir na nuesa llingua la cultura, historia, patrimoniu y medio natural, n’horarios d’audiencia máxima, incluyendo conteníos empobinaos al públicu infantil y xuvenil, y conteníos deportivos y xeneralistes”.

Na estaya referida a la ‘Reforma estatutaria y institucional’ defende “impulsar una reforma del Estatutu d’Autonomía d’Asturies que”, ente otres coses, “consagre d’una vez la oficialidá de la llingua asturiana, y de la fala o gallego-asturiano nel so ámbitu territorial tanto pa garantizar la conservación d’ún de los más importantes patrimonios culturales de los que gociamos como pa reconocer los derechos llingüísticos de los sos falantes”.

Pa consultar el programa, calca equí.

Foro: El partíu asturianu tresmitió a esti mediu dixital que la so intención yera espublizar el programa eleutoral mañana o’l miércoles.

ACTUALIZACIÓN: Foro, na parte de 'Cultura' de la estaya 'El cambiu pa conformar la nueva Asturies', dedica una parte al 'Patrimoniu llingüísticu'. Nella apunta que considera la "llingua asturiana y la fala como llingües propies d'Asturies y parte imprescindible del nuesu patrimoniu que necesita ser protexíu y promocionáu".

Darréu fai trés propuestes, siendo la primera dar "un reconocimientu llegal que cumpliendo colo dispuesto nel artículu 3.2 de la Constitución Española y adaptándose a la realidá sociollingüística específica d'Asturias, garantice al empar el so usu con plenu efeutu xurídicu pa los falantes y la voluntariedá pa los que nun les conozan o nun les quieran usar". Tamién defende que "la llei d'usu que garantice estos derechos s'apruebe cola mesma mayoría reforciada que necesita la reforma del Estatutu d'Autonomía", esto ye, 27 diputaos, y la promoción de "políticques que contribuyan a la normalización llingüística en toles esferes de la sociedá asturiana favoreciendo la so presencia na Alministración, l'enseñu, la toponimia y nos medios de comunicación".

Na estaya 'El cambiu p'ameyorar la calidá de vida de los asturianos', en concreto la de 'Educación de calidá y llibertá nun estáu de bienestar', Foro fala na parte d'Infantil y Primaria que va dar "valor a la nuesa cultura. Potenciaremos el conocimientu y aprendizaxe de la cultura, la historia y llingua asturiana al traviés de programes específicos que permitan a los escolares amar y valorar la so tierra". Por contra, nun fai referencia nenguna na parte de 'Educación Secundaria y Bachilleratu' nin na de 'Escueles Oficiales de Idiomes'.

No que respeuta al ente públicu de comunicación, apunta que "velará pola calida y ameyorará la eficiencia de la RTPA al considerar necesariu'l caltenimientu d'esti serviciu públicu por", ente otros trés puntos más, "el conocimientu y divulgación de los fechos diferenciales y de los recursos autóctonos con especial sofitu a la cultura y la llingua asturiana".

VOX: El programa presentáu pola so candidata, Carolina López, resúmese a una serie de 12 puntos nel que falen del asturianu nel dedicáu a ‘Frenar a los que pretenden trayer delirios separatistes a la cuna d’España’. Nel mesmu apunten que “Asturias ta en riesgu de convertise nuna rexón más víctima del separatismu. VOX siguirá protexendo a los asturianos de les imposiciones ideolóxiques d’aquellos que pretenden utilizar el bable como instrumentu de división ente españoles y marafundiu de perres públiques en chiringos de promoción de la ‘llingua’”.

Restu de partíos: Andecha Astur ye una formación comprometida dafechu col idioma y ente les propuestes que ta difundiendo ta la de ‘Oficialidá 100%’ na que reclamen una Llei de Normalización del Asturianu, la vehicularidá nel enseñu y el so emplegu como llingua de comunicación n’Alministración y nos medios de comunicación públicos. Tradicionalmente favoratible al reconocimientu de los derechos de los falantes d’asturianu, Verdes EQUO Asturias nun fai nel so programa referencia nenguna al idioma.

Ente los partíos de creación nueva, SOS Asturias nun se posicionó en contra de la oficialidá, anque n’interacciones con usuarios en redes sociales aseguró dar prioridá a otros asuntos: “Cuando toque, enantes hai qu’iguar la sangría demográfica, la precariedá en Sanidá y Educación, l’atención a persones mayores con atención especial nel mundu rural, dotar d’atención psicolóxica a les urxencies y emerxencies, fiscalidá positiva rural...”, respondieron nun tweet a una entruga de si taben pola oficialidá.