“Esta edición de ‘Suenos’ ía algo importante pa mi por el QR, pa que s’escuite”, afirma Rosa Cunqueira

Nel mes de xunetu, en Trabáu, presentábase la segunda edición de ‘Suenos. Versos cunqueiros’, de Rosa Cunqueira, primer obra na variante cunqueira del asturianu, espublizada nel 2011, que llega agora cola novedá de ser un “audiod.dibru”. La propia autora grabó nel estudiu de Cuatro Gotes Producciones los poemes y desplazóse a esi mesmu llugar de Xixón pa dar a conocer el so trabayu.

“Esta edición de ‘Suenos’ ía algo importante pa mi por el QR, pa que s’escuite, y outro porque’l 25 cientu se va donar a un proyecto guapísimo que creamos tando Viturino vivo que se llama #SalvaElMundoRural", espresó Rosa Rodríguez, más conocida como Rosa Cunqueira. En concreto destínase'l "25 por cientu dus cuartos que se saquen" p'acabar de restaurar el Mulín de Rusil, en Vid.dardecendias, nel conceyu d'Ibias.

Una manera de facer territoriu. “Lo que me purriú les ganes de sacalo foi esto d’esto d’atrás –pola contraportada del llibru, onde s’esplica’l proyeutu–. La necesidá d’esos cuartos pa poder terminar este proyecto que fue lo que fixo qu’este d.dibru esté aquí”, apuntó l’alma de la tienda-taller La Guarida del Cunqueiru xunto col so fíu Vítor, dando continuidá nuna etapa nueva a El Rincón Cunqueiru qu’entamara con Viturino nel 2004, porque “el que nun lucha por el territorio desde el territorio nun puede saber lo que significa esto. Los que llevamos casi más de la mitad de la nuesa vida luchando por el territorio, sí lo sabemos. Pola nuesa identidá, pola nuesa cultura, polas nuesas costumes… Ía lo que fae qu’una cosa como ésta sea tan importante pa nós”.

Y recuerda, “morremos, tamos en peligro d’estinción. Pedimos ayuda, llevamos anos pidiendo ayuda, pero agora mismo tamos ya casi al borde. Como no nos ayuden vamos acabar estinguiéndonos literamente, por lo menos los cunqueiros”.

Enantes, Inaciu Galán, de Cuatro Gotes, que conduxo l’actu, presentara a Rosa, nomada l’añu pasáu Muyer Rural d'Asturies, como “una muyer que vien faciendo un llabor impresionante pola cultura asturiana, pol conceyu y pola conservación de la cultura cunqueira, un llabor impagable. Tolos reconocimientos que te faigan son pocos”.

Un trabayu que fai dende “un sitiu tan pequeñu, tan periféricu, que paez imposible que pueda tener tanta repercusión”, xenerando “una onda en toa Asturies mui importante que pon en valor el patrimoniu propiu, que sirve d’exemplu pa otros llugares y pa una forma d’entender la esplotación de los recursos turísticos y culturales y del territoriu”, que “respeta non sólo l’espaciu, sinón tamién la tresmisión del idioma y la cultura del llugar”.

En definitiva, “construyendo futuru, construyendo territoriu”, confesando Galán “admiración y interés pol trabayu que facéis”, que tresmite Rosa “mui bien na poesía”.

Roberto González-Quevedo y el cursu de Zarréu

“Nun faigo cousas pa que me premien, nin faigo cousas pa que la xente m’halague. Las cousas se faen porque nun hai quién las faiga y, por otru d.dau, una persona sola nun fai nada; muitas personas xuntas faen un mundo”, respondió Rosa a les pallabres de Galón.

Darréu rellató a los presentes cómo nació ‘Suenos. Versos cunqueiros’. “Roberto González-Quevedo ye lo más importante d’este d.dlibru, sin él nun esistiría”, aseguró.

Foi en Zarréu, nun cursu d’asturianu que se solicitó al Conceyu de Degaña, cuando l’académicu daría con falantes d’esta variante que, como confiesa nel ‘Entamu’ de la obra, pensaba que yera un mitu. “Mandó escribir y siempre escribo en poema”, apuntó Rosa, qu’atopó la propuesta de González-Quevedo de convertir tolos escritos fechos nel cursu nun llibru al final de les clases.

“Lo que pretendía cuando’l primer d.dibru que sacamos yera que fuera real, que dentro de 40 anos el que lu d.dia lu d.dia como yo falo”, espresó l’autora, que nun se considera escritora nin ten en proyeutu, anque sigue escribiendo, asoleyar otru llibru. Nun descarta, sicasí, qu’haya continuidá en Vítor que, diz, “escribe mui bien” y domina’l cunqueiru.

‘Suenos. Versos cunqueiros’, qu’incorpora un QR en cada poema pa poder sentir recitalu a Rosa y otru que lleva a una torna al castellanu “porque quería que cualquiera en cualquier idioma pudiera escuitalo o pudiera entendelo”, col deséu de que se pueda llevar a otres llingües minoritaries “como l’eusquera, el catalán o’l gallegu; que tamién tuvieran la opción de poder entender por lo menos lo que quería tresmitir colos poemas”, nun ta entá distribuyíu en llibreríes. Pue mercase en La Guarida del Cunqueiru y tamién va tar disponible nel llar de Cuatro Gotes nel xixonés barriu de L’Arena.

Na semeya, Rosa intervién ayeri con Galan a la so derecha sintiendo les sos pallabres.