Espublizáronse les precandidatures de los Premios de la Música

Grupos como Babylon Chat, La Bandina, DRD, Dixebra o Skama la rede axunten
un montonáu de precandidatures en diferentes categoríes nos Premios qu'organiza añalmente l'Academia de la Música, entidá venceyada a la Sociedá Xeneral d'Autores . No que
cinca al meyor cantar n'asturianu tán preseleccionaos cinco cantares,
"El café del pescador" de Vicente Díaz, "La vaca
roxa del puertu" de Rafa Lorenzo, "Los suaños suaños
son" de Skama la Rede, "Memoria de los Carbayos" de Llangres y
"Somos" de Dixebra.



Los grupos asturianos chisquen
les llistes
d'estes precandidatures, apaeciendo en categoríes bien diferentes.
Estes llistes de preselecciones son enforma llargues, pero son un primer pasu
p'algamar dalgún de los premios a repartir. Por exemplu en meyor autor
revelación tán David Varela y Santi Caleya pol tema "Na
caleya" del últimu discu de La bandina
"de
romandela". Nesta mesma categoría tán DRD pol cantar
"Mareña" del so discu
"Namái".



Na categoría d'artista revelación volvemos a topanos con La
Bandina y con DRD, que comparten la llista con otru grupu asturianu como
Babylon Chat. Ésti últimu grupu tamién apaez na llista pal
meyor cantar col tema "Baile de disfraces", y na categoría de
meyor álbum onde alcontramos tamién el discu
"Salia"
de Corquiéu.. Amás de tar sellecionáu pa meyor cantar n'asturianu, Rafa Lorenzo tamién apaez na llista de meyor a´lbum de nueves músiques col so discu "Pabirún pabirún". El rock alternativu asturianu topa sitiu tamién
nesta categoría gracies a la presencia de
Dixebra
y Skama la Rede colos sos respectivos
discos. Como nun podía ser d'otra mena, hai un fuerte presencia
asturiana ente los preseleccionaos a meyor discu de música tradicional,
ehí tán colos sos discos Llangres, DRD, La Bandina y
Corquiéu.



Nomes de profesionales de la música asturiana tamién apaecen
n'otres categoríes como meyor productor artísticu, onde tenemos a
David Varela, Santi Caleya y Sergio Rodríguez pol so trabayu nel discu
de La Bandina, Rubén Bada nel "Namái" de DRD, Lisardo
Lombardía pol discu de la zanfonera Celia González y Ígor
Medio pola producción en Salia de Corquiéu. Vuelven a apaecer el
nome de Sergio Rodríguez na categoría de meyor técnicu de
soníu en dos candidatures, polos discos de La Bandina y DRD,
compartiendo nésti últimu la preselección Rubén
Bada. Fina la presencia asturiana nesti primer peñera con
Vicente Díaz ya que'l video del
so cantar "El Café del pescador" ta seleccionáu na
llista de meyor video musical.



Depués de la publicación d'esta selección, ábrese
un periodu de rectificaciones sobre esta primer llista hasta'l 19 d'avientu, pa
después entamar el procesu que dea cola llista final de candidatos.