“Esperamos que la derecha llea la sentencia y dexe de facer el ridículu emplegando l’asturianu como elementu de controversia política”, apunta Álvarez

La vocera del Gobiernu, Melania Álvarez García, pidió seriedá a les formaciones polítiques qu’amosaron la so disconformidá col emplegu de la llingua asturiana na Xunta Xeneral. “Esperamos que la derecha llea la sentencia del Constitucional, entienda’l so razonamientu y dexe de facer el ridículu y de convertir l’usu del asturianu nun elementu de controversia política”, afirmó la conseyera.

A entruga n’asturianu d’Asturies.com na rueda de prensa posterior al Conseyu de Gobiernu, onde s’aprobó’l decreto que regula’l procedimientu pa la acreitación de profesionales d’Enfermería pa la indicación, usu y autorización de la indicación de medicamentos y otros productos sanitarios, ente otros asuntos, apuntó que “el Parllamentu asturianu merez seriedá, sosiegu y aldericar los problemes trescendentes pa la sociedá asturiana”. Nesi sen, cuida contar col PP pa que “sepa distanciase de los plantegamientos, los pronunciamientos, nesti casu de VOX”.

Ayeri fíxose pública la sentencia del Tribunal Consticional que torga’l recursu d’inconstitucionalidá contra la modificación del Reglamentu de la Xunta Xeneral presentáu polos 52 diputaos de VOX nel Congresu. Ésta afita l’usu del asturianu nel Parllamentu asturianu basándose en que se reduz namái a la Cámara y nun obliga a tolos poderes públicos de l’autonomía, y en que l’apartáu 2 del artículu nuevu, el que da a la Mesa la función d’adoptar los criterios oportunos nel casu de qu’un diputáu afirme nun entender l’idioma, garantiza que nun se debilite’l control a l’aición parllamentaria por parte d’esi diputáu.

Semeya obra d'Armando Álvarez.