Espediente sancionador pal proyectu d’urbanización de Truyés

Nel pueblu de Truyes, en conceyu Corvera, una promotora cuenta con construyir 600 viviendes y un campu de golf sobre una superficie de cerca de 1 millón de metros cuadraos, un proyectu urbanísticu al que s'oponen colectivos ecoloxistes y una asociación vecinal. El Ministeriu de Mediu Ambiente ta acabante d'abrir espediente a la promotora por entamar obres ensin autorización.

El proyectu urbanísticu na parroquia corverana, ún de los meyores exemplos d'arquitectura tradicional asturiana del conceyu, ta acabante de recibir otru toque d'atención dende l'alministración. Si va agora un mes yera la Conseyería de Cultura la que-y recordaba al Ayuntamientu de Corvera la necesidá de caltener el noyu de Truyés y encamentaba a que s'enxertare'l pueblu nos catálogos de bienes inmuebles reconocíos como patrimoniu, amás de protexer activamente aquellos inmuebles que yá tuvieren protección llegal, agora ye'l Ministeriu de Mediu Ambiente'l que ta acabante d'abrir d'espediente de sanción a la empresa promotora Dolabay-Erma poles obres que ta faciendo ensin permisu y qu'afecten a los calces fluviales qu'esisten nel llugar

La Coordinadora Ecoloxista d'Avilés, que tuvo conocimientu de l'apertura d'esti espediente, diz que la empresa entamó les obres en setiembre del 2004 contando namás con una llicencia municipal pa la retirada de los matos y escayos de les finques. Según los ecoloxistes, con esta licencia como únicu encontu llegal, la empresa entamó movimientos de tierres, tronzó árboles y dañó'l patrimoniu arqueolóxicu del Marapicu. Inda más, el grupu conservacionista acusa a la empresa de tar "acosando" a dos families busquen onde treslladar les sos ganaderíes énte lo que consideren "una espropiación publica pa favorecer un pelotazu urbanísticu".

L'escritu de comunicación d'apertura del espediente sancionador, el Comisariu d'Agües de la Confederación Hidrográfica del Norte conseña que les obres produxeron movimientos de tierres, corta d'árboles de ribera, escavación nel manantial de Lladrera y otres obres na zona de policía del ríu de Truyes ensin tener l'autorización alministrativa obligatoria.