Espectáculu vergoñosu nel Tartiere

Un partíu que no futbolístico foi en forma guapu, frayóse dafechu nel minutu 35 cuando Aldeondo respondió a una agresión de Valero y dambos acabaron a puñetazos. El porteru del Ceares collaboró con una patada pela espalda al navarru y entamó la tangana ente tolos que teníen accesu al campu, que solo terminó cola intervención policial nel mesmu campu. Espectáculu llamentable al que-y siguieron provocaciones de los xugadores del Ceares y la so fisioterapeuta y que s'encargó de rematar Rogelio con unes absurdes declaraciones na rueda prensa ("Aldeondo amenaza al rival con manda-y ciertu partíu políticu a casa, y nun foi solo a nós, sinón tamién a más equipos", darréu d'estes declaraciones, el téunicu abandonó la sala prensa ensin esplicar más). Al final del partíu dambos equipos ganaron los vestuarios pel túnel del equipu uvieín colo que los del Ceares consiguieron safase del públicu que taba esperando na rodiada del so túnel, evitando asina males mayores.

Como dicíamos, no deportivo'l partíu resultó perguapu pal espectador, los dos equipos buscaron siempre'l gol, lo que xunto colos fallos defensivos del Uviéu fizo que se vieran munches ocasiones y goles perguapos. Rivas fizo abondos cambios nel equipu titular, dando entrada a Nacho Matador, Lluismi, Xandru, Ballester ,Cervero y Juanchi como novedaes respeuto al pasáu Xueves. Enfrente, un Ceares mui ofensivu que siempre dio la cara y buscó la portería uvieína siempre tocando´l pelotu, y nunca nun se zarró atrás como davezu faen los equipos que visiten el Tartiere. De parte carbayona, destacar l'asentamientu nel equipu de Nacho Matador, el gran partíu de Xandru y la gran movilidá y bon regate d'un Ballester que-y da munches alternatives al xuegu del Uviéu, no negativo los fallos defensivos y la falta de definición qu'a puntu tuvieron d'espeyase nel marcador como pasara'l xueves na Copa Federación.

Espectáculu de vergüenza'l vistu ayeri nel Tartiere que nunca nun pue repetise nun campu fútbol y sobre'l que la Federación tendrá de tomar midíes. Nel restu de partíos de tercera destacar la oncena victoria del Ribesella y la guapa llucha pola cuarta plaza que paez tar cada vegada más animada y abierta a más equipos. Perbaxo, el Samartín pue soñar con lluchar pola salvación gracies a los tres puntos qu'algamó contra'l Llanes y que lu ponen a 6 de siguir l'añu qu'entra na mesma categoría.