Especialidá docente: los sindicatos educativos acusen de "falta de voluntá" a los gobiernos estatal y asturianu

La modificación de los reales decretos pa crear la especialidá docente d’asturianu ye un posibilidá real pa los sindicatos educativos. Éstes son les razones qu’esponen SUATEA y CC OO Enseñanza.

“Tamos no mesmo de siempre, ye como chocar con un frontón” y “lo que faen ye echar balones fuera” son les respuestes primeres que dan Xosé Lluis Colodrón, responsable de la Secretaría de Llingua Asturiana del Sindicatu Unitariu Autónomu de Trabayadores de la Enseñanza d’Asturies (SUATEA), y Borja Llorente, secretariu de Comisiones Obreres (CC OO) Enseñanza, al ser entrugaos pola posición caltenida ayeri pola ministra d'Educación, Formación Profesional y Deportes, Pilar Alegría, énte’l pidimientu de la conseyera Lydia Espina de desbloquiar la creación de la especialidá docente de Llingua Asturiana y Gallego-asturiano. Una situación que-yos produz enfadu.

“La competencia direuta ta nel Parllamentu asturianu. Cola oficialidá, los decretos estatales reconoceríen automáticamente la especialidá docente”, apunta nun primer momentu Colodrón, que cita la posibilidá de “modificar en Madrid esos decretos pa que reconozan tamién la especialidá d’aquelles llingües con reconocimientu llegal nos estatutos, como ye’l nuesu casu”.

“Nun ye verdá. Nun se necesita qu’un idioma sía oficial pa que pueda tener especialidá, como asocede col inglés, el francés, l’alemán o’l portugués”, señala Llorente, que critica la “falta de voluntá política del Gobiernu”. Porque la modificación de los reales decretos nun ye un inconveniente: “Nel 2018 modificáronse col PSOE nel Gobiernu y nel 2023 tamién pa introducir aspeutos de la Formación Profesional y otres coses”, rellata.

Colodrón considera que l’Executivu estatal “nun s’enfota nello. Si quier, la competencia ye d’ellos”. Y l’asturianu “nun-y aprieta muncho les tuerques. Va pidiendo la especialidá, dicen-y que non y confórmase. Debería demandar que s’atienda’l so pidimientu. Tampoco tienen munchu enfotu”.

“Hai falta de voluntá política”, insiste’l secretariu de CO OO. “El Gobiernu d’Asturies ta nuna zona de confort. Ye como’l Dr. Jekyll y Mr. Hyde. Xueguen a la confusión y nun se pue xustificar que claudique”.

350 profesores ensin estabilidá llaboral

La falta d’especialidá docenten provoca que “350 compañeros nun tengan estabilidá y tean condenaos a la precariedá, con mayoría de medies xornaes”, denuncia Llorente. La so creación permitiría “qu’hubiera oposiciones y acabar cola interinidá, yá que la mayoría del profesoráu d’asturianu ye interín”, diz el representante de SUATEA.

Datos del 2021 de CC OO reflexen que, nes primeres axudicaciones, en Primaria había 189 maestros, “de los que 35 teníen xornada completa y 154 a media xornada”. En Secundaria y Bachilleratu, 77, “35 a xornada completa y 42 a media xornada. Y los númberos actuales son asemeyaos”.

“La falta d’estabilidá supón un detrimentu de la calidá”, apunta’l representante de SUATEA, lo qu’afeuta principalmente a escolines y escolinos. “Cada añu renueven el contratu y puede que toque o non el mesmu maestru”, diz Llorente, polo que nun hai contunidá na asignatura como asocede nel restu.

Na semeya, Espina y Alegría salúdense na visita de la ministra a Uviéu en setiembre pa participar nunes xornaes de la consyería.