España conviértese nel sestu estáu en dar el pasu de llegalizar la eutanasia

El Congresu, cola oposición única del PP, VOX, Unión del Pueblo Navarro (UPN) y Isidro Martínez Oblanca, diputáu de Foro, aprobó esti xueves la Llei orgánica de regulación de la eutanasia. España conviértese asina nel sestu estáu, depués de Países Baxos, Bélxica, Luxemburgu, Colombia y Canadá, en regular la muerte digna.

Con 198 votos a favor, 142 en contra y 2 astenciones, que correspuenden a Joan Capdevila i Esteve (ERC-Sobiranistes) y Ferran Bel (PDeCAT), cumplióse’l trámite últimu p’aprobar la eutanasia tres les enmiendes del Senáu. La norma, propuesta pol PSOE, va entrar a valir a los trés meses de la so espublización próxima nel Boletín Oficial del Estáu (BOE), sacante’l so artículu 17, referente a la creación y composición de las Comisiones de Garantía y Evaluación, que lo va facer al día siguiente.

La eutanasia pasa a ser reconocida como un derechu individual nel ordenamientu xurídicu estatal, entendida como “l’actuación que produz la muerte d’una persona de forma direuta y intencionada per aciu d’una rellación causa-efeutu única y inmediata, a pidimientu informáu, espresu y repitíu nel tiempu por dicha persona, y que se faiga nun contestu de sufrimientu por mor d’una enfermedá o padecimientu incurable que la persona esperimenta como inaceptable y que nun pudo ser amenorgáu por otros medios”. Asina toles persones que cumplan los requisitos previstos na llei van poder solicitar y recibir la prestación d’ayuda pa morir de forma digna, que podrá revocar en cualquier momentu y que tará incluyida na cartera común de servicios del Sistema Nacional de Salud, con financiación pública.

La Comisión de Garantía y Evaluación, en caún de les autonomíes, va tener les funciones de “verificar de forma previa y controlar a posteriori’l respeto a la llei y los procedimientos qu’afita”. Va contar con un mínimu de 7 miembros, con presencia de personal médicu, d’enfermería y xuristes.

Tamién Nueva Zelanda y Portugal

El primer estáu en regular la muerte digna foi Países Baxos, nel 2002, al que-y siguió darréu Bélxica. Nesti tiempu validaron la eutanasia tamién Luxemburgu, Colombia y Canada, mentes que Nueva Zelanda va facelo a lo llargo d’esti añu y Portugal ta en trámites.

Otra manera, hai dalgunos territorios d'Estaos Xuníos y Australia onde esta práutica tamién ta permitida. En Suiza, mentes, ye llegal el suicidiu asistíu.