Esixen la dimisión del director del Centru de TVE n'Asturies

L'asamblea de trabayadores del Centru Autonómicu de RTVE n'Asturies pidió esti llunes la dimisión del director del centru, José Antonio Ovies, al qu'acusen de caciplar nes informaciones y aprovechar el cargu de manera interesada y non profesional.

Nun comunicáu soscritu por unanimidá, l'asamblea de trabayadores del centru denuncia que la manipulación política de los informativos de la cadena estatal n'Asturies ta pasando con muncho de lo normal, y dicen que la otra selmana mandóse-yos dar una noticia que yera mentira. Según los trabayadores de RTVE, una concentración énte la sede del PP d'Uviéu contra l'ataque a Iraq en que se tiraron güevos contra la fachada del edificiu convirtiose nel informativu "Panorama Rexonal" nun ataque a les oficines populares en que los manifestantes entraron a la sede popular desgraciando parte del mobiliariu. Énte esta manipulación, los trabayadores del centru, que lleven seyes meses ensin xefe d'informativos, cargu qu'ocupa d'oficiu'l mesmu Ovies, píden-y al director que dimita.