Esfarraplen les bolses mientres xube'l petroleu

Les duldes sobre la Economía d'Estaos Xuníos xunta la xuba llibre del preciu del petroleu tan echando fuera de los mercaos bursátiles a munchos inversores. La inestabilidá nes bolses y la mala traza de les perspectives a curtiu plazu tiraron p'abaxo pelos principales índices otra vegada. La comunidá inversora quier pasar les vacaciones en paz y nun-yos interesa tener metíes les perres en renta variable, colo que los mercaos internacionales asítiense en mínimos del añu.

Ente les estadístiques más destacaes la selmana atopamos el datu de confianza de la Universidá de Michigan, que con 94 puntos, marcó menos de lo esperao, y tamién nos Estaos Xuníos el datu de precios de la producción con una xuba del 0,1%. Na Zona Euru'l datu del PIB interañal foi del 2%. L'IPC de Francia del mes de xunetu algamó un resultáu del 2,3% meyor de lo que se contaba.

Cayida perimportante nes bolses del Vieyu Continente. La bolsa de Llondres foi una de les más afectaes con perdes penriba'l 0,4% siguía de París y Francfort con cayíes sobre'l 0,3%. Al otru llau del Atlánticu les bolses d'Estaos Xuníos tienen resultaos bien probetayos. L'índiz Dow Jones peslló nos 9.825,35 puntos dempués d'una xuba del 0,11%. L'índiz tecnolóxicu Nasdaq trancó nos 1.757,22 puntos con un xuba del 0,27%.

Dempués de trés cayíes a mínimos añales el selectivu Ibex-35 sigue perbaxo los 7.600 puntos. La selmana pasada asitióse nos 7.578,30 (-0,6%). El volume de negociu foi de 1.341 millones d'euros. Les perdes afectaron a la mayoría de los valores como Abertis, Repsol, BBVA, Santander, Endesa, Iberia, Metrovacesa y Telefónica. Nel terrén positivu destacó Gamesa con una xuba penriba'l 3%.

Les esportaciones de crudu iraquino tan a la metada dempués del resurdimientu del conflictu bélicu tres la ocupación norteamericana, anque los mercaos de materies primes aselaron gracies al referéndum en Venezuela onde ganó'l presidente Hugo Chávez. Dende'l gobiernu venezolanu insisten en que van caltener la producción ensin baxa -Venezuela ye'l quintu productor mundial d'oru prieto-. Na mesma llinia de conflictos y duldes sigue ensin igua'l casu xudicial sobre la petrolera rusa Yukos. La selmana pasada'l barril West Texas mangóse nos 45,8 dólares mentanto que'l barril Brent asitióse nos 42,9 dólares.

L'euru sigue siendo una de les divises con meyor salú como diz la so cotización col dólar: 1,2343 dólares por unidá. Les males estadístiques de defícit comercial y el datu de la Universidá de Michigan tiraron p'abaxo pela divisa norteamericana. Nel mercáu de renta fixo los bonos a llargu plazu caltuvieron la so rentabilidá nel 4,042% nel casu del bund alemán.