Escueyi'l meyor cantar asturianu del 2005 n'Asturies.com

Esti diariu entama otra vuelta'l so PREMIU ASTURIES.COM AL MEYOR CANTAR
N'ASTURIANU 2005, que llega a la so tercera edición. Asina como
n'años anteriores queremos que seyan los llectores d'Asturies.com los
qu'escueyan el meyor cantar n'asturianu del añu acabante de finar.
Amás, tolos que dean el so votu por un cantar va entrar nel
sortéu de trés llotes de regalos, cortesía de los
patrocinadores d'esti Premiu, les cases de discos
L'AGUAÑAZ y
FONOASTUR, los locales
EL CAFÉ TRISQUEL y EL BARUKU,
l'asociación
ESCUELA
DE MÚSICA TRADICIONAL LA QUINTANA DE XIXÓNy la empresa
ARAZ NET.



El mecanismu del Premiu d'Asturies.com va ser igual que na edición
pasada. Primero va haber un periodu nel que los llectores van proponer cual
ye'l cantar que más-yos prestó. Los cantares que se pueden
proponer han cumplir delles condiciones. En primer llugar tienen que ser cantares
orixinales (non tradicionales) y en segundu llugar han tar espublizaos y distribuyíos por primer vegada
ente'l 1 d'avientu de 2004 y el 30 de payares de 2005. Pa proponer ún cantar y entrar al sortéu de regalos hai que rellenar el formulariu que vien na páxina del concursu



N'acabando esta primer fase, qu'entama güei seyes de xineru y que va finar el
próximu vienres día 20, va facese'l recuentu de les candidatures
recibiés y van escoyese los trés cantares que más
propuestes reciban. Estos trés cantares van pasar a la final, que se
va facer nun Conceyu Abiertu onde los llectores d'Asturies.com van poder votar
pol meyor de los trés cantares y opinar sobre ellos. Asina, a la fin, tendremos el
cantar ganador de 2005, que va venir a xuntase a los temes vencedores
n'ediciones pasaes, que foron Sangre d'Ochobre de Skanda en 2004 y Brañas
d'Antañu de Gatos del Fornu en 2003.



Dende Asturies.com queremos deseá-yos muncha suerte a tolos artistes y grupos que faen posible que la música asturiana sía una realidá, y agradecé-yos
otra vuelta la collaboración a los nuestros patrocinadores, les cases
de discos L'AGUAÑAZ y
FONOASTUR, los locales
EL CAFÉ TRISQUEL y EL BARUKU,
l'asociación
ESCUELA
DE MÚSICA TRADICIONAL LA QUINTANA DE XIXÓN y la empresa
ARAZ NET.



Participa y da'l to votu calcando equí