Escapada na primer etapa

La primer etapa de la Vuelta a Asturies vio'l trunfu del corredor del Relax Fuenlabrada José Manuel Maestre, qu'aguantó una escapada de 63 kilómetros na que llegó a tener hasta 3minutos 45 segundos de ventaya pa ganar raspiao al pelotón na llínia de meta. La etapa foi rápida y entretenía col pelotón espurríu cásique tol recorríu en filera d'a ún y comiendo toles escapaes hasta qu'a la salida de Cangues d'Onís Maestre foi quien a saltar xunta Fabrice Salanson (La Boulangere) y Julien Laidoun (AG2R). Los dos franceses foron descolgándose del español, que dexó atrás primero a Laidoun y depués a Salanson nel altu de Llamigo, de segunda categoría. Atrás, l'equipu Phonak diba encurtiando la diferiencia, pero la falta d'entendimientu y l'estáu de la carretera nun dexaron trabayar bien a les locomotores del pelotón, colo que la fin de la etapa foi una agonía con Maestre sofriendo p'acabar y el pelotón, agora col equipu Milaneza emburriando, tentando d'atrapar al escapáu pa dexá-y l'esprint a Ángel Edo. La suerte decidiose pol corredor del Relax, qu'acabó imponiéndose por namás dos segundos de diferiencia

Güei ye la segunda etapa, que sal de Llanes pa llegar a Xixón. Nel recorríu namás hai dellos altos de segunda y tercera, pero'l perfil tien bien de repechos y a 29 kmts de la meta ta l'altu de Samartín de Güerces, que pue francer la carrera.