Erice acusa a Moa de facer “apoloxía d’un golpe d’estáu”

El debate ayeri sobre ochobre del 34 ente'l polémicu escritor Pío Moa y los historiadores asturianos Francisco Erice y José Girón espeyó la resquiebra ente dos maneres opuestes d'entender la historia. Sicasí, Ochobre del 34 quedó nun llugar mui secundariu, centrando la evolución de la II República toles argumentaciones.

La primer intervención corrió a cargu de Francisco Erice, qu'entamó l'actu condenando una "determinada manera de facer historia" en clara referencia a Pío Moa. La crítica d'Erice túvose en trés pegollos, el primeru "que se faiga historia presentista asitiando la mentalidá del presente nos acontecimientos del pasáu" , el segundu "que se faiga una historia estrada d'anacronismos y descontestualizaciones" y, sobremanera, "que se faiga una historia fatalista na que se presenta la República como una especie de error históricu que namás podía conducir a una Guerra Civil". Erice faló tamién de la confusión de términos que gasten ciertos autores que-yos dan el mesmu significáu a conceptos como guerra civil alzamientu o revolución, condenando les histories maniquees y dualistes que ven solo dos posibles llectures, claramente identificaes con bandos políticos.

Darréu faló'l decanu de la facultá d'Historia, José Girón, que, nuna intervención de brocha gorda, esplicó lo que pa elli yeren les causes que llevaron a la revolución, centrándose n'esplicar qu'España yera un país que nunca nun conociere la democracia hasta la llegada de la república y que vivía nuna situación d'atrasu que namás el primer gobiernu de la república intentó torgar, convirtiéndose'l gobiernu de la CEDA nuna estorbisa reaccionaria que llevó a les fuerces progresistes a rebelase.

Pío Moa, pela so parte, limitóse a repetir los mesmos argumentos que yá dixere na presentación del so llibru en Xixón: los socialistes nun podíen aceptar un gobiernu de la derecha por mui democráticamente escoyíu que fuere y conspiraron coles demás fuerces d'izquierda pa facer una guerra civil, como demuestra'l llevantamientu d'ochobre del 34. Moa punxo en dulda la llexitimidá d'una república qu'echó a la monarquía gracies al resultáu d'unes cencielles elecciones municipales y emponderó a la CEDA por respetar la llegalidá democrática cuando los socialistes demostraben que nun yeren a cumplir con ella, conspirando constantemente pa traer un réxime soviéticu.

L'escritor gallegu, qu'entamó'l debate con polémica "menos mal qu'equí podemos falar abiertamente, non como cuando presenté'l llibru en Cataluña, onde hai un déficit democráticu por culpa del nacionalismu" negó munchos de los argumentos y datos de José Girón, pero esmució les crítiques de métodu de Francisco Erice, quien nel segundu turnu d'intervenciones precisó que, puestos a buscar conspiraciones contra la república, podía falase del alzamientu del Xeneral Sanjurjo o de la financiación dende Italia a grupos facistes yá dende'l momentu en que se proclamó la mesma república. Moa retrucó esplicando que facía falta lleer la biografía d'Azaña, principal fonte de los sos argumentos, pa entender que los socialistes nun-yos valía con aquella democracia y queríen "la guerra", mientres que la derecha taba cediendo muncho al tragar con un réxime nel que nun se sentía representada, repitiendo l'argumentu de que Franco foi l'últimu en llevantase n'armes porque vía venir una guerra contra la república. Col públicu tomando yá parte nel debate interrumpiendo y palmotiando, Erice retrucó fulminante a Moa, al qu'acusó facer apoloxía d'un golpe d'estáu por pretender que l'alzamientu del 36 fuere un movimientu de defensa.