ERC, nel disparaderu

Parez que los que s'opunxeron a la llei Partíos Políticos paguen un preciu por ello, sobremanera si tienen una ideoloxía independentista. Esquerra Republicana de Catalunya, ún de los partíos que votó a la escontra d'esta polémica llei, aportando una visión razonada y esplicando los porqués de la so oposición, y que siempres apostó por una salida dialogada al conflictu vascu, ta dende ayeri nel disparaderu de los medios de comunicación a cuentu d'una entrevista qu'hubo ente los sos dirixentes y los de Batasuna l'otru añu, col asesinatu d'Ernest Lluch entovía bien de recién. L'artículu del diariu madrileñu ABC que destapó la polémica, diz qu'ERC pidió a ETA vía Batasuna que dexare de facer atentaos en Catalunya a cambeu de delles contraprestaciones, dexando cayer qu'hai conexones directes ente'l partíu catalán y l'entornu terrorista vascu. La web d'ERC, que nunca nun ñegó que s'entrevistaren con Batasuna, da una visión abondo distinta de los términos en que se desarrolló l'alcuentru, esplicando que trataben de facer llegar al entornu abertzale la so visión sobre les negatives consecuencies de la serie d'atentaos que daquella taba acabante de facer ETA en Cataluña. ERC, contraria al usu de la violencia, afitose nesti apueste al reclamar güei qu'ETA dexare de matar y facer atentaos en Cataluña y en cualquier otru llugar.