Equo-LV considera que l’emplegu verde podría crear 10.000 puestos de trabayu n'Asturies

El reciclaxe, la movilidá y tresportes sostenibles, la rehabilitación y meyora enerxética d’edificios, y les renovables xeneraríen 10.000 puestos de trabayu nel país, según los datos que manexa Equo-LV. Son los nomaos ‘emplegos verdes’.
 
Según la definición dada pol Programa de Naciones Xuníes pal Mediuambiente (PNXMA), emplegos verdes son “aquellos que reducen l’impautu ambiental de les empreses y los sectores económicos hasta algamar niveles sostenibles”. Asina, según les cifres d’Equo-Los Verdes d’Asturies, que se basen nos Informes del Instituto Laboral de Trabajo Ambiente y Salud (ISTAS), Greenpeace, la Unión de Consumidores de Asturias, Ecoloxistes n’Aición, l’Asociación para la defensa de la Sanidad Pública, Garrigues, l’Asociación Profesional de Plantas de Valorización de Residuos (Aeversu) y en casos concretos como’l de la ciudá alemana de Friburg, namái cola reutilización y reciclaxe de les 450.000 tonelaes de residuos urbanos que se pretendíen quemar al añu na incineradora de Serín, xeneraríense 2.000 puestos de trabayu que se sumaríen a los 450 esistentes, mentes que la planta impulsada pol PSOE y PP y paralizada pola xusticia cuenta con crear 80 emplegos.
 
No que respeuta a les enerxíes renovables, l’estudiu últimu del ISTAS considera qu’una apuesta por esti sector traería consigo 1.550 puestos de trabayu. Pa algamar estes cifres, el 30 por cientu de la producción enerxética debería venir per esti calce. Mentes, el desarrollu de la movilidá sostenible y el tresporte públicu daría llugar a 3.750 emplegos y la rehablitación enerxética d’edificios, a 2.500. Dende Equo-LV afirmen qu’estos puestos de trabayu son “estables, suxetos a procesos que se mantienen nel tiempu a plazu llargu y nun espuestos a regulaciones nin desllocalizaciones venceyaes a la reducción del coste salarial, tan habituales y tristemente d’actualidá nel Principáu”. Por último, la organziación ecoloxista llama por apostar tamién pola producción hortofrutícola pa la creación d’emplegu, yá que considera que la esplotación de 10.000 hectárees nel país xeneraría otros 20.000 puestos de trabayu más y ayudaría a equilibrar la balanza comercial y a averanos a la soberanía alimentaria.
 
Conferencia n’Uviéu
 
A les 18.30 hores de güei, la Fundación Ecoagroturismo ECOTUR, cola collaboración de la Universidá d’Uviéu, la Fundación Equo, RhoGroups, CO OO y UXT, entamen una conferencia alredor d’esta temática na sala 3 del Auditoriu d’Uviéu baxo’l títulu de ‘Empleos verdes: oportunidad para crear trabajo y empleo decente'. Ésta va correr a cargu de Joaquín Nieto, direutor estatal de la Organización Internacional del Trabajo (OIT) y, tres la so intervención, va celebrase una mesa redonda na que tamién van participar Tomás Emilio Díaz, decanu de la Facultá de Bioloxía; José Alba Alonso, profesor d'Economía Aplicada; José Manuel Pérez, ex xerente de Valnalón; Lidia Fanjul, cofundadora de la consultora Gaia y Sofía; Miguel Morán, presidente de RhoGroups; Jesús Alonso, secretariu de Salú Llaboral y Mediu Ambiente de CC OO; y Esther Alonso, secretaria de Salú Llaboral, Cambiu Climáticu y Mediu Ambiente d'UXT.