Enzancos nel camín del mirandés

La llingua mirandesa pasa per momentos difíciles. Anque ye oficial dende 1.998, l'especialista Amadeu Ferreira denuncia la mala situación del idioma nel sistema educativu

Va seyes años, la declaración d'oficialidá sacó al mirandés d'una dómina escura. Nos años 50, falar mirandés taba mal visto y lo guapo yera falar "fidalgo" (portugués). Dende los 80, el llabor d'estudiosos y filólogos rescató la llingua de Miranda y, cola década de los 90 yá dando les boquiaes, el mirandés recibió l'estatus d'oficialidá que tendría de valir la supervivencia definitiva de la llingua. Naquellos años el Mirandés convirtióse incluso nuna cuestión de moda, pero cuando pasa'l primer llustru d'oficialidá, la llingua hermana del asturianu atópase con que tien deberes por facer.

La voz más crítica cola política llingüística que ta faciéndose col mirandés ye la del especialista Amadeu Ferreira, persona condecorada nel so día pol presidente de la República Portuguesa precísamente pol so llabor investigador a favor del mirandés. Va yá trés años, Ferreira prendió los primeros pilotos d'alarma cuando la llei 107/2001 del patrimoniu cultural portugués escaeció facer cualquier referencia al mirandés. Agora, Ferreira ve un grave peligru pa la supervivencia de la llingua en xeneraciones futures na probe política d'escolarización del idioma que diz que ta faciendo'l Gobiernu portugués, que tamién vivió nesti tiempu un cambéu de color políticu col ascensu del PSD de Durao Barroso.

Ferreira denunció esta selmana que'l mirandés tien, yá dende los años 60, francíes munches pontes de tresmisión xeneracional nel ámbitu familiar, lo que fai preciso que la llingua se tresmita tamién al traviés de la escuela. Sicasí, la quexa del investigador céntrase en que'l Gobiernu portugués y l'alministración educativa de la rexón del norte de Portugal tan faciendo un esfuerzu mui curtiu en rellación a les necesidaes reales. Ferreira denuncia que en munchos casos, pa baxar costes, los mayestros de mirandés nun s'asignen a los centros hasta poco enantes de la navidá. La mengua nel númberu d'hores que s'acuten pa la materia y el fechu de que munches escueles que tienen dos neños matriculaos en mirandés nun reciban mayestru que lo imparta tamién reciben la condena del estudiosu

L'alministración local fai de menos les crítiques de Ferreira y diz que ta faciendo tola presión que puede sobre les autoridaes educatives pa meyorar la situación, anque reconoz que sí ye verdá que, nel casu de les escueles con pocos neños matriculaos, dase un casu d'agraviu comparativu cola asignatura de relixón, a la que se-y asigna un profesor n'habiendo ún escolín matriculáu. António Carção, responsable d'educación de la Câmara Municipal de Miranda do Douro reconoz que la llingua sufre "un gran revés" tamién pol ambiente d'acusaciones y busca de protagonismu que tienen na so opinión, munchos escritores en Mirandés que tan faciendo coles sos actuaciones personales "perder prestixu a la llingua"
Más información en "Diario de Tras os Montes"