Entraes de baldre pa ver a McCartney

Cuando namás queden hores pal conciertu del ex-Beatle Paul McCartney en Xixón, delles empreses que desenvuelven la so actividá n'Asturies tan regalándo-yos entraes pal mesmu a los sos clientes.

La entidá financiera Banesto o Telefónica son dos de les les empreses que tan regalando entraes.

Nel casu de la empresa de telecomunicaciones, les entraes tan regalándose de dos en dos al traviés de mensaxes SMS pela filial de móviles Movistar, que mercó miles de papeletes pal conciertu de mañana en Estadiu d'El Molinón.

Énte'l mal ritmu de la venta d'entraes, que llevó la selmana pasada a intentar negociar una cancelación del mesmu, la organización del macroconciertu vendió paquetes d'entraes a empreses col oxetivu de meyorar la entrada mañana martes.

Ello ye que la selmana pasada namás se llevaben vendíes sobre 10.000 entraes d'un aforu total de cerca de 40.000. Los representantes del artista y la mesma alcaldesa de Xixón manifestaron que'l ritmu de venta de les entraes diba xubir estos últimos díes, y asina yá se lleven vendíes cerca de 18.000

El conciertu de McCartney, que va durar sobre dos hores y media, va tener un repertoriu mayormente d'antiguos cantares de los Beatles y va ser el primeru de la so xira de branu del 2.004.