Entra en vigor la prohibición pa plantar pataca per dos años en cuatro conceyos del país

Esti xueves espublizóse nel BOPA la resolución que prohibe plantar pataca en Santiso d’Abres, A Veiga, Taramundi y Castropol per un mínimu de dos años, al igual qu’en zones de Navia, Cuideiru y Valdés. La causa ye la plaga de la poliya guatemaliana de la pataca.

La Conseyería de Desarrollu Rural y Recursos Naturales declaró estes zones d’estos seis conceyos zones infestaes pola Tecia solanivora (Povolny), animal qu’entró al continente européu nel 2015 per Galicia. Agora, l’occidente del país ta sufriendo les consecuencies de la so llegada, con daños nel productu provocaos pola gata del insectu, que s’alimenta del tubérculu faciendo galeríes, tanto en campu como n’almacén.

La normativa nueva cola fin de frenar la so expansión per Asturies afita la prohibición de pataca nestos territorios mientres un periodu mínimu de dos años y hasta que se declare oficialmente el desaniciu de la plaga. Asina toles plantaciones del tubérculu esistentes nes zones infestaes van ser desenterraes, retiraes y destruyíes, con control oficial, nel tiempu más curtiu posible.

Nos almacenes d’autoconsumu y otros depósitos domésticos nun se va dexar l'almacenamientu de pataques orixinaries de zones infestaes. Amás, van ser desinfectaos y desinsectados de manera adecuada y van instalase trampes con feromona sexual específica pa la captura de la poliya. Tamién se van destruyir los sacos y embalaxes que tuvieren en contautu coles pataques contaminaes o na mesma estancia.

Mentes, nos almacenes comerciales van destruyise tolos llotes de pataca almacenaos y va desinfectase’l llocal. D’igual forma namái va poder vendese’l productu nes zones infestaes si va envasáu. La resolución del BOPA afita tamién les indemnizaciones que van recibir pa tolos sectores venceyaos a la producción y comercialización del tubérculu afeutáu pola poliya.

Zones tapón

Amás de toes estes midíes, el Gobiernu establez zones tapón naquellos llugares onde esti insectu d’orixe centroamericanu se detectó, pero que van tar sometíes a una vixilancia especial por llendar con territorios afectaos. Éstos son Tapia, El Franco, Cuaña y Villayón, a lo qu’hai que sumar la zona llibre de poliya de Navia, Valdés y Cuideiru.