Entra en vigor la normativa que desanicia los petroleros monocascu

La norma nueva obliga a desguazar tolos barcos del tipu de los que protagonizaron los mayores desastres ambientales nos últimos años.

La normativa redactada pola Organización Marítima Internacional y la Unión Europea que ta acabante d'entrar en vigor prohibe la navegación d'agora en p'alantre de petroleros que nun dispongan de cascu doble col oxetivu de torgar que nel futuru ocurran más desastres ambientales como los que protagonizaron l'Exxon Valdez, l'Erika o, con consecuencies más directes n'Asturies, el Prestige.

La norma nueva va suponer un problema pa les empreses navieres que se dediquen a carretar petróleu, y ello ye que de los cerca de 3.500 barcos que se dediquen a esti tresporte son sobre 1.700 los que son monocascu y que van tener de retirase ente esti añu y el 2010 como fecha tope. La falta de tresparencia del sector y les práctiques qu'avecen a gastar les empreses lleven a les organizaciones ecoloxistes a desconfiar del procesu que se siga pa desguazar estos barcos. Greenpeace, que denuncia que l'Exxon Valdez, responsable de la catástrofe d'Alaska nel añu 1989 sigue navegando baxo'l nome de "mediterranean" diz que tien mieu de que, en cuenta d'un desguace llimpiu, se lleve masivamente a estos petroleros, que contienen grandes cantidaes de materiales altamente tóxicos como los PCB's o l'amiantu a los cementerios de barcos del sudeste asiáticu, onde se desmantelen ensin precuru nengún pol reciclao de los sos componentes y en condiciones de total falta de seguranza.