Entamó la Vuelta a Asturies

Samuel Sánchez ye la baza del ciclismu asturianu nuna carrera que va tar condicionada pol cambéu que sescudió anguaño les competiciones ciclistes al echar a andar el UCI Pro Tour, una "lliga de campeones" na que nun entra la Vuelta a Asturies. Cambiada de feches nel calandariu, la carrera asturiana perdió nesti 2005 el calter de pieza estratéxica nel calandariu ciclista como previa al Giro d'Italia que foi a lo llargo d'estos años últimos, pero ello tampoco nun quitó pa que dellos equipos enxertos nel UCI Pro Tour vinieren a correr a Asturies, rescamplando ente ellos l'alemán T-Mobile y l'Euskaltel Euskadi, un equipu compuestu esclusivamente por corredores vascos sacantes ún, l'asturianu Samuel Sánchez, que vien a casa como líder teóricu de la formación.

Igor Astarloa y Pavel Tonkov son otros nomes a tener en cuenta nuna carrera marcada pola muerte esti miércoles del corredor italianu Alessio Galetti, que morrió d'un ataque al corazón xubiendo l'Altu la Manzaneda nel trescursu de la clásica del Naranco, que suel facer de prólogu a la carrera por etapes. El so equipu, Naturino-Sapore di Mare, retiróse de la competición, qu'entamó ayeri con trunfu al sprint en Llanes del veteranu ciclista rusu Dimitri Konishev sobre precisamente l'asturianu Samuel Sánchez y Igor Astarloa tres d'una etapa marcada por un calor qu'aparraba a tolos espectadores pero non a los ciclistes, que rodaron en medies altísimes. La vuelta sigue cola segunda etapa Llanes- Avilés de 163 kms y con un altu de segunda.