Entamó la campaña pa les europees

A les 12 d'esta nueche entamó la campaña pa les elecciones al Parlamentu Européu del 13 de xunu. Tolos partíos asturianos que se presenten celebraron ayeri la tradicional primer pegada de cartelos, sacantes la candidatura d'Andecha Astur-Europa de los Pueblos, que va entamar oficialmente la campaña mañana sábadu en La Pola Siero.

La escena de la pegada de cartelos repitióse per dellos puntos de la xeografía asturiana. Asina, la Federación Socialista Asturiana llevó a los candidatos asturianos de la llista socialista Antonio Masip y Laura Robles hasta'l barriu uvieín de La Corredoria, mientres que'l Partíu Popular escoyó ún de los sos feudos, el conceyu de Llanera, pa presentar al eurodiputáu asturianu y candidatu Salvador Garriga nun actu al qu'asistió Ovidio Sánchez. La tercer fuercia electoral, Izquierda Xunida, repitió l'escenariu de les xenerales de marzu, presentando campaña y candidatos en "La Bodeguita del Medio" conocida sala de baile de la zona de Fomentu de Xixón

Pela so parte, el Partíu Asturianista, que se presenta a estes elecciones enxertu na "Coalición Europea" xunta Partíu Andalucista, Coalición Canaria, Partíu Aragonés (PAR) y Unió Valenciana, entamó campaña nun actu que se celebró xunta'l campus universitariu d'humanidaes de La Vega, n'Uviéu.

La campaña nun entamó oficialmente pa tolos partíos, en cuantes qu'Andecha Astur, que se presenta cola candidatura "Europa de los pueblos" na que tamién tan presentes Esquerra Republicana de Catalunya, Chunta Aragonesista o Eusko Alkartasuna, va retrasar hasta mañana sábadu l'entamu de la so campaña. Ello va ser na Escuela "Hermanos Arregui" de La Pola Siero, onde mañana van celebrase actos actos centrales del "Díi d'Andecha". La organización nacionalista va contar nel mitín central de la xornada cola presencia de Josep Andreu, diputáu en Congresu d'Esquerra Republicana de Catalunya, en cuenta de Jesús Maestro, que nun va asistir por problemes d'axenda política al programar d'última hora un viaxe a Marruecos.