Entamen unes charres en Tinéu sobre instrumentos tradicionales

La Escuela de Música de Tinéu va desenvolver esti mes de marzu un programa de charres. Nél se quier amosar a tolos interesaos dalgunos de los instrumentos menos conocíos na tradición musical asturiana. El ciclu echa andar esti mesmu vienres día 3 de marzu con una charra dedicada al Harpa a cargu del músicu Daniel García de la Cuesta.

Les charres van ser toes a les 20:00 hores na Casa la Cultura de Tinéu. Ellí van tar Merce Santos (La Bandina) falando de la zanfona'l día 17 de marzu y Indalecio Santos (Los Llanzones) el día 24 charrando sobre'l clarinete. Enantes, los díes 3 y 10 de marzu, va ser el turnu de Daniel García de la Cuesta, pa falar sobre l'harpa y la bandurria respectivamente. Esti músicu de folk, miembru de grupos como Merlín o Lliberdón, rescampla pol so llabor investigador nel campu de la música tradicional , espublizando recientemente sobre la bandurria y l'harpa.

Esti programa de charres va tener un pieslle musical bien guapo con un conciertu'l día 31 de marzu a cargu de Mariluz Cristobal Caunedo, acompañada por Llorián García cola gaita, los componentes de DRD y Celia González colos panderos y la zanfona. El conciertu, que va ser nel Cine Marvi a les 20:00 hores, va sirvir pa la presentación en Tinéu del discu de Mariluz "Cantar de Seronda".