Entamen cursos d'asturianu a distancia de nivel básicu 1 y 2

Iniciativa pol Asturianu pon les clases dende'l 1 de febreru hasta lo primero del mes de mayu.

Yá ta abierta la matriculación pa los cursos d'asturianu nivel básicu 1 y 2 qu'entama la organización. Éstos van facese a distancia al traviés de la so plataforma dixital.

El primer nivel ta empobináu a persones ensin conocimientos d’asturianu o con nivel baxu de conocencia ya inclúi, pa les persones que lu superen, un diploma de l’Academia de la Llingua Asturiana. El segundu, mentes, oriéntase a persones con una conocencia más fonda del idioma o que yá fixeren dalgún cursu enantes.

El preciu de la inscripción ye de 60 euros, de 50 pa los socios d'Iniciativa pol Asturianu, y les clases van principiar el 1 de febreru, allargándose hasta lo primero de mayu. En total son 36 hores llectives.

La xente interesao ha rellenar el formulariu disponible na web de la organización col vienres 28 de xineru como fecha llende. Hai disponibles 20 places pa cada nivel.