Entama'l programa de vacaciones pa emigrantes

Les ayudes pa emigrantes vueltos cuenten con un presupuestu total de 120.000 euros y tienen por oxetivu cubrir los gastos estraordinarios que se deriven del fechu de la vuelta a casa, y tamién pa cubrir delles necesidaes de los emigrantes o de familiares que tengan al cargu d'ellos.

Pa dar les ayudes van tenese en cuenta criterios como la situación de precariedá de los emigrantes asturianos vueltos a Asturies y los gastos que-yos vengan del tresllau del país au emigraron a Asturies, anque nun van contar los gastos que deriven de mercar o vender inmuebles o de facer la mudanza

Les ayudes puen pidiles emigrantes asturianos que volvieren a Asturies y los sos familiares y descendientes hasta'l segundu grau de consanguinidá que tengan nacionalidá española y que regresaren a Asturies nun plazu máximu de dos años enantes de presentar la solicitú, y tamién los que s'alcuentren en territoriu español temporalmente. El plazu pa pidir estes ayudes espúrrese hasta'l30 de setiembre.

D'otra parte, l'axencia asturiana de la emigración convoca tamién el programa de vacaciones pa emigrantes "Señaldá" (l'antiguu programa Añoranza qu'asturianiza'l so nome) esti programa afala l'alcuentru de los emigrantes asturianos mayores de 65 años cola so familia y con Asturies al traviés d'estancies nel país de 15 díes. Al programa puen apuntase tamién emigrantes de menos de 65 años que lleven 45 años ensin pisar Asturies. Con un presupuestu de 185.000 euros el plazu p'acutar plaza nel programa vacacional remata'l 16 de xunetu de 2004.