Entama'l primer cursu de gallego-asturianu p'adultos en Tapia

Güei Xueves preséntase nel IES de Tapia'l Cursu d'Alfabetización p'Adultos en Gallego-Asturiano, qu'organiza la Secretaría Llingüística del Navia-Eo de l'Academia de la Llingua Asturiana en collaboración cola Asociación Cultural Xeira.

La lección inaugural del cursu, abierta a tol públicu que quiera asistir, va ponela'l veigueñu José Antonio Fernández Vior, que va facer una descripción xeneral del gallego-asturianu y de la so situación actual. Nel actu de presentación van tar tamién el responsable de la Secretaría del Navia-Eo Xosé Antón González Riaño, la presidenta de l'ALLA Ana Cano y el presidente de Xeira, Xabiel, G.Méndez.

La Secretaría Llingüística del Navia-Eo sorraya que se trata del primer cursu d'estes característiques en cuantes que se dirixe a la población en xeneral y define los oxetivos de la iniciativa alfabetizadora en dar unes nociones básiques a los estudiantes sobre la escritura de "a nosa fala" y conocer les sos característiques, historia y lliteratura. El cursu tien 17 persones inscrites que vienen de tolos conceyos de la marina occidental (Castropol, Tapia, El Franco, Cuaña y Navia)