Entama’l plazu pa matriculase nos cursos de la Universidá Popular de Xixón

Col veranu dando les boquiaes, la Universidá Popular de Xixón entama dende güei y hasta'l 24 de setiembre'l plazu de matriculación pa una ufierta formativa de 168 cursos, de los que 44 son de creación nueva y que ponen un total de 2.745 places. Ente los cursos nuevos apaecen dellos que traten temes d'actualidá y trescendencia social como'l que se dedica a la muyer nos medios de comunicación, cultura y tradición del pueblu sahararui o clonación, tresxénicos y bioética. La cultura asturiana ta presente na ufierta formativa de la UP, que, xunta los tradicionales cursos de llingua asturiana en niveles básicu y avanzáu va estrenar un nuevu taller dedicáu a la historia de la vivienda n'Asturies.

La matrícula, con precios que van de los 8 a los 102 euros acordies cola duración de cada cursu y los materiales que precise, pue facese al traviés de la páxina web del conceyu y tamién nes alministraciones públiques de l'Antigua Pescadería y Oficines d'Atención al Ciudadanu de los centros municipales integraos de L'Arena, El Coto, La Calzada y Xixón-Sur Pumarín.