Entama'l llabor pa rescatar el Castillo de Salas

Depués de decisiete años baxo l'agua, el barcu fundíu más famosu d'Asturies va dexar el sitiu qu'ocupa enfrente del Cerru de Santa Catalina de Xixón. El "Castillo de Salas" embarrancó el 11 de xineru de 1986 a resultes d'un fallu cuando maniobraba p''atracar nel Puertu d'El Musel, onde contaba con descargar les cásique 100.000 tonelaes de carbón americano que traía de Norfolk. Depués de cuatro díes intentando libralu, el cascu franció en dos cachos, decidiéndose d'aquella llevar la parte de delantre mar adientro y echala a pique, mientres que de la parte d'atrás desarmose lo que se pudo y dexose que fundiere lo demás nel mesmu llugar del accidente, a bien pocos metros del muelle de Xixón y de la Playa de San Llorienzo. Anque d'aquella negose que quedaren restos contaminantes en barcu, ello ye que d'entós p'acá los servicios de llimpieza del Ayuntamientu retiren tolos años una media de 300 tonelaes de carbón de la playa más importante del conceyu.

La situación del Castillo de Salas llevó a un cruce d'acusaciones ente alministraciones que nun queríen cargar cola culpa, pero a la fin los restos del barcu van marchar pa siempre de Xixón. El Ministeriu de Fomentu encargó-y la obra de retirada del cascu a la empresa Titan Maritime, qu'ayeri presentó en Xixón la gabara "Cormorant", encargada de sacar el peciu. Anque la retirada del cascu va da-y fuelgu a la playa, ello nun quita pa que nestos años los submarinistes alcontraren nel Castillo de Salas un llugar prestosu pa conocer la fauna del llugar, que vio nes chapes ferruñentes un criaderu puestu a costafecha. Nesta web pue vese un planu de la situación del barcu y un reportaxe de semeyes dende'l fondu de la mar.