Entama’l cónclave pa escoyer al Papa

Ciento quince cardenales, ente ellos l'asturianu Francisco Álvarez, van facer güei la primera votación pa escoyer al sostitutu de Xuan Pablo II al frente de la Ilesia Católica.

La votación secreta tien llugar na capiela Sistina, la famosa ilesia llevantada pol papa Sixto IV y decorada por Miguel Ánxel. Ellí, el cónclave cardenaliciu entama una xunta que va rematar nuna votación secreta pa escoyer al socesor al frente del escañu de Pedro. Pa salir escoyíu un papa en primera ronda, esti ha tener dos tercios de los votos (mínimu 77 de los 115), socediéndose les rondes de votación a un ritmu de cuatro per día. Casu de llegase al tercer día de cónclave ensin Papa escoyíu, faise una pausa consagrada a la oración y al coloquiu, y en pasando trés tandes más de siete escrutinios caúna, la regla de la mayoría de dos tercios ruempe y yá namás se precisa mayoría cenciella de la metada más ún de los cardenales.

Les previsiones falen de dos grandes grupos, ún d'ellos más conservador alredor de la figura del cardenal Ratzinger y un segundu iguáu polos favoratibles al cardenal Carlo Martini, anque, tratándose d'un cónclave pa escoyer Papa, siempre ye difícil aldovinar nin facer quinieles.
Más información: Radio Vaticano y TV Vaticano Wikipedia
Weblogs: Papabile - The Pope blog