Entama un ciclu de conciertos nel Muséu Etnográficu del Oriente

El Muséu Etnográficu del Oriente d'Asturies de Porrúa (Llanes) entama un ciclu de conciertos que van llevar por títulu xenéricu "Nuevos sones, vieyos instrumentos" presentándose nellos a músicos y músiques de tola xeografía española comprometíos cola reellaboración de la música tradicional, tresmitida, reinventada y proyectada a las xeneraciones nueves d'aficionaos. El primer conciertu va facese'l sábadu 9 de xunu na Sala d'esposiciones del Muséu a les 20:30h cola participación del zanfoneru Rafael Martín y el grupu Umbria.

Rafa Martín, conocíu pola so participación nel grupu folk "La Musgaña", tien grabao con diferentes grupos de música antigua y cuenta con collaboraciones con artistes como Kepa Junkera o Luis Delgado. Pela so parte, el grupu Umbría reinterpreta'l folklor tradicional castellanu al traviés del usu d'instrumentos como'l rabel o la gaita de la sierra, y siempre con arreglos que busquen lo cenciello y lo primitivo. Ente les sos collaboraciones apaecen artistes y grupos como Balbarda, Rafa Martín, Aljibe, Hexacorde, Brenga astur, Celia Gonzalez, o Muyeres.