Entama mañana la II Promoción de la Escuela d’Asturianía

29 alumnos, descendientes d'asturianos de les más diverses procedencies, participen dende mañana na II promoción de la Escuela d'Asturianía, un proyectu empobináu a la emigración asturiana qu'echó a andar allá pel añu 2002 gracies a la iniciativa del Conseyu Asturianu de Comunidaes y la Federación Internacional de Centros Asturianos y que completó l'añu pasáu la so primer promoción formativa.

Los estudiantes, que tan llegando a Asturies a lo llargo del día de güei procedentes de los centros asturianos de l'Arxentina, Brasil, Chile, Uruguay, Venezuela, México, Francia, Bélxica y España, van deprender a lo llargo de los próximos quince díes n'Uviéu conocimientos básicos sobre cultura y música asturianes col aquello de que, a la vuelta a los sos países d'orixe, puedan ellos tamién dar formación como monitores neses estayes.

El ciclu formativu en cultura y tradiciones asturianes que se preparó dende'l Conseyu de Comunidaes Asturianes cola asesoría d'Alberto Rodríguez y Vicente Sánchez, profesores de la Escuela universitaria de Maxisteriu, comprende 3 años de cursinos de 100 hores caún nos que s'enseñen gaita, percusión y baille. Aparte de los conteníos específicamente musicales trátase tamién de que los alumnos d'estos cursos tengan un contactu cola Asturies real d'anguaño y la so cultura, calteniendo asina viva la rellación ente Asturies y los más de 300.000 asturianos, ente emigrantes y descendientes de primer xeneración que tan espardíos pel mundu.