Entama la segunda fase del programa DICA, dirixíu a la dixitalización del comerciu de proximidá

|
DICA Villaviciosa

Participen 1200 empreses asturianes a les que se ufierten ferramientes nueves p’aplicar nel so negociu.

La Casa de los Hevia en Villaviciosa, acoyó esti llunes l'entamu de la segunda fase del Programa Integral de Dixitalización del Comerciu d'Asturies (DICA), que se presentó col demostrador de soluciones innovadores pal comerciu, una de les ferramientes tecnolóxiques desarrollaes pol CTIC. L'oxetivu del demostrador ye averar al comerciu de proximidá aplicaciones de les tecnoloxíes, al traviés d'usos concretos y tanxibles.

Nel actu, tuvieron presentes el director de Comerciu, Emprendimientu y Economía Social, Julio Zapico, l'alcalde de Villaviciosa, Alejandro Vega, y Cristina Simón, presidenta de l’Asociación de Autónomos Comerciantes y Servicios de Villaviciosa (Acosevi). Ye’l puntu de salida de la xira d'esta ferramienta, que va pasar per 26 poblaciones asturianes, hasta llegar el 30 de xunu a Bual.

Al traviés d'un itinerariu d'estaciones, pueden atopase exemplos aplicables a munchos tipos de comerciu, dende un simulador en vivu de gafes pa establecimientos d'óptica, a un exemplu de cómo la realidá aumentada pue ser aplicada por profesionales del diseñu d'interiores o l'arquitectura. Tamién contién tecnoloxíes como’l blockchain. Nesti casu, va usase pa siguir la trazabilidá de dellos productos asturianos, como quesu, lleche o carne envasao.

La Conseyería d'Industria, Empléu y Promoción Económica, qu’entamó esti programa de dixitalización a fines del añu 2020, lleva analizaos 1.204 comercios de toa Asturies. En Villaviciosa hai 21 que tan siguiendo un percorríu personalizáu ofertáu por consultores de CTIC, y 643 lo faen a nivel autonómicu. Tamién hubo 108 xornaes de sensibilización y formación.

Contador Estadistiques