Entama la carrera por Lorient col troféu de gaita "Remis Ovalle"

El Troféu de Gaita nel que s'escueyen a los representantes asturianos nel prestixosu concursu de gaiteros del Festival Intercélticu de Lorient entama col apertura del plazu d'inscripción nel troféu "Memorial Remis Ovalle" que va celebrase n'Uviéu. Los participantes puen apuntase hasta'l vienres 2 de xunu personalmente o por corréu certificáu na Oficina d'Información Municipal de "L'Escorialín" o nes oficines de la Sociedá de Festeyos d'Uviéu.

La primera fase de selección del concursu va tener llugar nel Auditoriu Príncipe Felipe'l próximu 4 de xunu dende les 6 de la tarde, siendo la fase final el domingu 18 a les siete. 1.200 euros esperen pol primer clasificáu, 750 son el segundu premiu, 450 pal terceru y 300 pal cuartu clasificáu. Los cuatro meyores van recibir amás un troféu acreditativu y van representar a Asturies na fase final del Troféu Internacional de Gaita de Lorient. Les bases puen consultase na web del Ayuntamientu d'Uviéu .