Entama la carrera electoral

El Boletín Oficial del Estáu recueye na so edición de güei les candidatures aceptaes pola Xunta Electoral d'Asturies nes prósimes elecciones estatales a Congresu y Senáu a celebrar el día 14 de marzu (ver candidatures asturianes: páxina 1, páxina 2, páxina 3). Anque entovía hai un tiempu pa iguar fallos nes llistes, a la fin van ser 17 les candidatures que compitan polos 8 escaños a escoyer n'Asturies, mientres que pa los trés puestos en senáu preséntense candidatos por otres 17 sigles, anque dellos partíos que van pa la cámara senatorial nun se presenten al congresu y al revés.

Ente les candidatures con más posibilidaes d'algamar representación, el PP preséntase cola exconceyala uvieína y actual diputada Alicia Castro Masavéu, mientres que'l PSOE va con Álvaro Cuesta de cabeza de llista. Izquierda Xunida -Bloque por Asturies, que cuenta con repetir l'escañu que tien n'actualidá, enfótase nello col secretariu d'IX n'Asturies Jesús Iglesias

Xunta les trés candidatures actualmente representaes en Congresu (PP, PSOE y Izquierda Xunida) otres 14 llistes van competir pol votu de los 986.124 asturianos con derechu a votu. Pela banda asturianista esti añu van trés candidatures. El PAS presenta a Azucena Castaño, una relativa desconocía na escena política asturianista, mientres qu'Andecha Astur pon primeru na llista a Germán Abad, que tien como esperiencia institucional l'entrar como diputáu suplente por IX na llexislatura 91-95. Finalmente, Izquierda Asturiana va per primer vegada a unes elecciones en solitario col so fundador Faustino Zapico como candidatu al congresu.

Per otra parte, Los Verdes concurren a estes elecciones con Valentín Pérez García de cabeza de llista, mientres que'l PCPE pon a Severino Menéndez Minas al frente de la candidatura, Izquierda Republicana va con Lisardo Bello de candidatu y el CDS con Casimiro Avelino Álvarez de númberu ún

Otres candidatures minoritaries muncho menos conocíes son la del Partíu Humanista, que vuelve a poner llista n'Asturies o la del inéditu "Ciudadanos en blanco". Pela derecha del mapa apaecen un báramu de candidatures nel qu'hai qu'estremar hasta trés falanxes distintes (La Falanxe, Falanxe de les XONS y Falanxe Auténtica), la llista de Democracia Nacional y el Movimientu Social Republicanu, heriede del pensamientu del falanxista Ramiro Ledesma.