Entama la campaña pal referendum européu

Esta nueche de comadres entamó la campaña pal referendum a la Constitución Europea, una cita na que'l datu va tar más na participación que nel resultáu, que toles encuestes apunten que va ser a favor del tratáu. Por de pronto, los partíos nun ponen munchu rixu na campaña

Ente los trés grandes partíos con representación política n'Asturies, el Partíu Socialista pide'l votu al favor col slogan "Se trata de Europa" argumentando los beneficios que truxo p'Asturies l'aventura europea en forma d'ayudes económiques y emponderando'l valor de la constitución como un pasu más na construcción d'Europa como un espaciu públicu y xurídicu compartíu.

El Partíu Popular pela so parte, pide tamién el votu favorable con argumentos de calter más xeneralista, destacando baxo'l lema "Sí a Europa" qu'Europa nun pue ser namás un ente alministrativu, siendo anguaño un gran país, un espaciu común que ruempe llendes y nel que toos enxertamos los nuestros proyectos"

La tercer fuerza política del país, Izquierda Xunida, ye la única ente los grandes partíos que fai un apueste pol "non" sorrayando que'l tratáu échase al pie de la llibertá de circulaciónde grandes capitales y la competitividá empresarial torgando los derechos sociales. Pa IX, qu'entra en campaña col leit-motiv "Otra Europa ye posible - Non a esta constitución Europea" el tratáu debilita los sistemes públicos de Seguridá Social, nun fala de losservicios públicos y nun reconoz drechos elementales como'l derechu al trabayu.

Ente les formaciones asturianistes y nacionalistes hai posicionamientos pa tolos gustos sobre'l referendum de la Constitución Europea, y asina la coalición PAS-URAS píde-yos a los sos militantes el "Si" al tratáu qu'entienden que nun aporta demasiaes coses nueves sobre la llexislación que yá esistía na UE y cola que , anque la coalición que lideren Sánchez Vicente y Sergio Marqués nun va facer campaña específica, como adelantare a esti mediu Xesús Cañedo

La opción abstencionista deféndela'l Bloque por Asturies, que diz que tamos énte un "Referéndum-Trampa" del que yá se sabe d'antemano'l resultáu y que "sólo busca que los ciudadanos y ciudadanes llexitimemos un procesu con un grave déficit democráticu". La organización d'izquierdes diz que namás pue defendese l'abstención "énte una campaña institucional indigna que busca'l sí ciegu y que col dineru de toos pretende esplicar en quince díes lo que nos vienen escondiendo dende va años"

D'otra banda, dos partíos nacionalistes piden el "non" nel referéndum. En primer llugar, Andecha Astur, que xustifica la opción del votu en contra en dellos argumentos ente los que se cuenta'l que la constitución nun reconoza los derechos de nengún tipu de les naciones ensin estáu de la UE y el que nun afonde nos aspectos de calter social mientres que per otra parte sorraya la personalidá d'un Europa mercantilista. Andecha va facer campaña xunto con una plataforma na que tamién participen otres organizaciones polítiques como'l PCPE o sindicales como la Corriente Sindical d'Izquierdes col lema "La Constitución Europea ñega los Derechos de Pueblos y Trabayadores"

La otra opción nacionalista que s'asitia na negativa nel referéndum ye Izquierda Asturiana. El partíu que representa Naciu Llope va facer campaña pol "non" por entender qu'Asturies ye un espectador pasivu y sufriente del procesu d'integración na UE ", porque la constitución afita al Estáu español como únicu intermediariu y porque renuncia a facer una europa social ente otros argumentos. El lema d'IAS en campaña céntrase n'espeyar el papel qu'el partíu ve que tien Asturies nel procesu européu: "Asturies nun pinta nada"